• Número 421
  • 11 de febreiro de 2019

Oficina de Dereitos Sociais - Coia

Abanca castiga con comisións á clientela empobrecida

Abanca castiga con comisións á clientela empobrecida
Abanca saca peito presentando os datos exercicio de 2018.

Hoxe Abanca saca peito presentando os datos exercicio de 2018. Os seus beneficios ascenderon en 2018 até os 430 millóns de euros, un 17,3% máis que no ano anterior [1]. A entidade, herdeira das antigas caixas de aforros galegas, rescatada cos cartos de todas foi mercada por capital estranxeiro en 2013. Dende esa data nos petos de Juan Carlos Escotet, o seu propietario, non paran de entrar cartos [2].

Oficinas “cuquis”, unha chea de cartos gastados en “moderna” publicidade non son quen que borrar os miles de despidos, o peche de centos de oficinas, aniquilación da obra social e unha política comercial moi dura cos colectivos máis vulnerables.

Hai un tempo denunciabamos que Abanca estaba a facer embargos a persoas que cobraban prestacións por baixo do Salario Mínimo Interprofesional [2]. Onte coñecemos unha nova práctica abusiva da entidade. Acudiron, este luns, ao punto de información uns veciños coa cartilla de Abanca na man. Trátase dunha parella que cobra a RISGA e que vive coas súas fillas nunha vivenda que teñen que desaloxar. Viñan asustados e alporizados, xa que no pasado mes de decembro Abanca retiroulles polo concepto de comisións: 230 € en tan só tres días.

Comisións de 35€ por deixar a conta en descuberto, é dicir, por deixar o saldo da conta en cero. Da igual que retiraran 30, 50 ou 100 €. Cada vez que deixaban a conta en descuberto a entidade cobraba unha comisión de 35€. Abuso, usura... o vocabulario non é quen de explicar a carraxe provocada por esta práctica.

Nos últimos tempos, coincidindo coa reforma do sistema bancario que pagamos todas, aparece o concepto de “Exclusión Financeira” definido como “incapacidad de acceder a los servicios financieros básicos de una forma adecuada. Puede surgir como resultado de problemas en el acceso, las condiciones, los precios, el marketing o la autoexclusión en respuesta a diferentes experiencias o intuiciones negativas” (Sinclair, 2001).

Fronte a esta realidade, fronte aos abusos da banca non imos ficar cos brazos cruzados, están as nosas vidas en xogo. Organicémonos para buscar saídas a este sistema que cada día argalla novas formas para seguir medrando, sen pensar nas vítimas e na dor que provocan os seus movementos.

Coia, 30 febreiro 2019

[1] https://comunicacion.abanca.com/gl/noticias/resultados-2018-abanca-gana-...

[2] https://www.sermosgaliza.gal/articulo/economia/abanca-ganou-430-millons-...

[3] http://odscoia.arkipelagos.net/os-bancos-incumpren-lei-ao-embargar-prest...