O venres 11 de xaneiro de 2019 reuníronse en Madrid as seccións sindicais de CXT das fábricas de Vigo, Zaragoza e Villaverde pertencentes todas ao grupo PSA, máis a sección sindical do sindicato CUT da factoría de Vigo para responder ante a precarización laboral á que están a ser sometidas os persoais das fábricas apuntadas pertencentes todas ao polo ibérico do grupo PSA.

Na reunión mantida púxose en común a necesidade de unificar as loitas das diferentes fábricas para responder á continua degradación das condicións laborais que sofren @s traballador@ s nestas factorías. Ademais, as diferentes seccións sindicais insisten na necesidade de coordinar as loitas para seguir traballando pola defensa da saúde laboral dos distintos persoais, deteriorada polos inhumanos ritmos de traballo aos que son sometidos, pola defensa do emprego ante o abuso na contratación precaria a tempo parcial, pola defensa duns salarios sen perda de poder adquisitivo, por unha conciliación real entre a vida familiar e laboral, en definitiva impedir que se sigan rebaixando dereitos laborais @s traballador@s.

Lembran que a única vía para a recuperación de dereitos segue sendo a loita e as respostas coordinadas nos diferentes centros de traballo.