A Plataforma denuncia nun comunicado que  “segundo se publicou na prensa, a Valedora decidiu abrir un expediente aceptando mediar na queixa interposta por persoas cercanas á empresa que pretende a reapertura e ampliación da mina de cobre, pola colocación das ditas pancartas na Praza de Abastos”. 

As pancartas están situadas na Praza de Abastos e na Alameda de Santiago de Compostela “cos preceptivos permisos”. Ante a posibilidade de apertura de expediente que aceptaría as queixas de intereses próximos a Cobre San Rafael S.L., compañía detrás da reapertura da mina en Touro, as persoas que compoñen a Plataforma Veciñal reclaman que “de ser certo, extremo que nos gustaría que nos confirmara, a Valedora do Pobo tería comunicado a apertura dun expediente aceptando a queixa de persoas próximas á empresa”.

Desde o colectivo contrario á reapertura da explotación mineira, consideran que “a celeridade amosada pola Valedora no trámite da queixa desas persoas cercanas á empresa” contrastaría coas dificultades da mesma Valedora para “responder á demanda de información das plataformas e colectivos que se opoñen a esa reapertura”

Neste punto lembran que en maio de 2018 a Plataforma en Defensa da Ría de Arousa e a plataforma “Mina Touro-O Pino NON” acudiran á Valedora porque “a Administración galega resistíase a facilitar información pertencente ao expediente administrativo da mina de cobre”.  Non obstante, tal como din  no seu comunicado, a documentación requerida non foi enviada ao organismo público.

No escrito que presentaron este venres nas dependencias de San Caetano, sede da Xunta de Galicia, reclaman imparcialidade e eficacia á Valedora do Pobo “na defensa dos dereitos da cidadanía e coa crenza de que exercen un dereito legal”.

http://www.galiciaconfidencial.com/noticia/81490-reclaman-imparcialidade-valedora-pobo-mediacion-mina-cobre-touro