Desde a Unión Local de Cádiz do Sindicato Andaluz de Traballadoras/es, ante os acontecementos ocorridos durante e tras a manifestación antifascista que tivo lugar na capital onte 4 decembro, declaramos o seguinte:

En primeiro lugar, condenamos a violencia e represión policial que se viviu nas inmediacións da Praza Asdrúbal e a Avenida de Andalucía ao termo da manifestación, así como as detencións de manifestantes e a violencia exercida en dependencias policiais. Así mesmo, alertamos sobre posibles futuras detencións de manifestantes e a criminalización da resistencia antifascista, vinculado ao monopolio da violencia por parte do estado.

Consideramos fundamental narrar os feitos que aquí condenamos. Cando as persoas presentes ao termo da manifestación se dispersaban, a policía antidisturbios, que se atopaba no lugar desde case unha hora antes, procedeu a disparar bólas de goma e a realizar cargas na propia Praza Asdrúbal, obrigando á multitude a dirixirse cara á Avenida de Andalucía ou ao paseo marítimo. Xa na Avenida, as cargas policiais continuaron co lanzamento de pelotas de goma e, desde a Comisaría de Policía ata o Edificio dos Sindicatos, sucedéronse novas agresións e as detencións de dous manifestantes. A violencia exercida durante o arresto, totalmente desproporcionada e cos compañeiros xa reducidos, veríase continuada na furgoneta e en dependencias policiais. Tanto é así que un dos dous detidos estivo o día de hoxe hospitalizado, con graves feridas e contusións.

Actualmente atópanse en liberdade con cargos acusados de delitos de desordes públicas, desobediencia e atentado contra a autoridade, con posibles penas de ata 5-6 anos de cárcere.

Desde a UL do SAT-Cádiz consideramos inaceptable esta represión policial contra os sectores máis combativos do pobo gaditano, denunciamos o silencio mediático e a impunidade policial no uso da violencia e chamamos á solidariedade e apoio aos compañeiros detidos.

Ademais, celebramos a multitudinaria manifestación antifascista que percorreu onte as rúas de Cádiz e que aglutinou a diferentes sectores populares, fundamentalmente mocidade rebelde e organizacións feministas, nunha contundente demostración de rexeitamento ao ascenso electoral do fascismo. As máis de 4000 persoas que se deron cita ao longo da manifestación son a máis clara proba de que hai sectores da poboación gaditana que non están dispostas a que se normalice a entrada no Parlamento de partidos cun claro e explícito discurso fascista.

Desta forma, apoiamos a continuar a organización antifascista na cidade de Cádiz, tal e como se expresou na concorrida asemblea antifascista que tivo lugar hoxe na Plaza del Palillero, para o que é indispensable afastarnos dos ritmos e trampas da política institucional e realizar traballo de rúa entre a xente, nos barrios, centros de estudo e centros de traballo, para frear o ascenso do fascismo nas zonas populares da nosa cidade.

Por último, alertamos da natureza do fascismo, que vai máis aló da marca electoral Vox, e que verdadeiramente ancórase nas institucións do estado español de raíz franquista, na súa policía, os seus xuíces e parte da súa clase política. Lembramos que o fascismo está intimamente vinculado ao capitalismo e é o desenvolvemento último dunha necesidade de disciplinamiento e represión da poboación e da clase traballadora en momentos de crises do mesmo, sendo xestado e amparado pola burguesía e os medios de comunicación ao seu servizo. Por iso, animamos a desenvolver unha loita antifascista de longo percorrido e que vaia máis aló de conxunturas electorais e institucionais.

Contra o fascismo e a violencia policial, nin un paso atrás!

Todo o apoio aos detidos e represaliados pola Policía.

Cádiz, a 5 de decembro do 2018

Texto completo en: https://www.lahaine.org/est_espanol.php/comunicado-del-sat-ante-las