A titular de Facenda avanzou este luns que o Goberno priorizará a atención da prestación dos servizos públicos fundamentais, os investimentos produtivos, racionalizará os entes instrumentais e revisará as políticas de gasto corrente, así como de axudas e subvencións correntes.

A conselleira de Facenda, Marta Fernández Currás, explicou que para o vindeiro exercicio o Executivo verá minguada a súa capacidade de endebedamento a 729 millóns de euros, á metade respecto a este ano, pasando do 2,5  actual ao 1,3 por centro do PIB galego. En total a Xunta disporá duns 800 millóns de euros menos de recurso á débeda.

Segundo informou a titular de Facenda a Administración terá no 2011 un total de 964 millóns de euros de ingresos totais menos respecto ao exercicio en vigor. En canto aos ingresos non financeiros, a primeira estimación a Consellería amosa un descenso de 160 millóns de euros, o que supón un 1,7% menos que o ano anterior, ata os 9.477 millóns de euros, cifra que se sitúa nos niveis do 2006.

A estas cifras hai que engadir a referida á caída de ingresos financeiros (endebedamento), de 803 millóns de euros, un 52,4 por cento menos que neste exercicio, até os 729 millóns de euros.