Felicidades aos traballadores do Metro de Madrid
Dou o meu parabén aos traballadores do Metro de Madrid polos seus logros. O resto de funcionarios seguiremos cos recortes previstos e quizais nos poñan máis pola nosa pasividade e conformismo.
Se ben é certo que hai que facer recortes, non é xusto que se fagan a infinidade de funcionarios que roldan os 1.000 euros ao mes: hai moitos sitios onde recortar.
Minguar a calidade dos servizos públicos coa baixada de soldos aos funcionarios e privatizar a sanidade e a educación non é a mellor solución. Pero si deberían controlarse as miles de contratas privadas que realizan a función pública, xa que estas concesións supoñen un dispendio bestial e un enriquecemento dalgúns a custa dos impostos de todos. Saber o que se desborda en multitude de obras e servizos innecesarios ou presupostados abusivamente sería unha forma de ir controlando estes gastos.

O mundo que queremos para os nosos fillos
A igualdade de trato entre homes e mulleres foi un dos principios fundacionais da Unión Europea e unha loita constante dende hai medio século. A estas alturas, a propia Unión Europea aínda está na obriga de considerar "expresamente inaceptable" a violencia contra as mulleres en todas as súas formas e recoñece que en Europa son moitas as mulleres e nenas que sofren agresións ou explotación sexual, e ven vulnerados os seus dereitos fundamentais á liberdade, dignidade e seguridade e integridade persoal.
Xa non se trata unicamente dunha loita obrigada das diferentes administracións públicas e gobernos, senón que a propia sociedade continúa xerando unha prepotencia e un odio machista, a idades moi temperás, difícil de controlar. A violación e asasinato de varias rapazas menores de idade por parte dos seus noivos ou de amigos da súa mesma idade débenos facer reflexionar sobre a sociedade que desexamos e os valores que transmitimos dende a escola e a propia familia aos nosos fillos.