Paralizados

É normal, nesta universidade, que a Xerencia sexa unha rémora a hora de actuar, case sempre lle interesa dilatar as cousas. O normal é que fronte a ese interese en “retrasar” a Xunta de Persoal empuxe para que isto non se produza ou se produza con menos frecuencia e que teña os menores efectos posible. Se miramos, xa non digo a novas negociacións, refírome ao xa acordado, vemos que nas promocións lévase un ano de retraso. Non me sorprende a actitude do xerente, aínda que non sexa máis que por aforrarse no PAS a miserenta cantidade de diñeiro que supón levar a cabo os acordos. Sorpréndeme a parálise na que entrou a Xunta de Persoal que non reclama, coa forza necesaria, que se cumpran os acordos.

Formación

Discrepo do método elixido para a concesión da formación na convocatoria extraordinaria de novembro. Habería que habilitar algún método que fose máis equitativo. Recorro ás preclaras mentes das persoas que forman parte da Xunta de Persoal para que debatan e articulen un xeito máis democrático de acceso á formación. Xa sei que este é un proceso extraordinario, que hai pouco tempo e que niso se xustifica o procedemento elixido pero entendo que se debe establecer outro.