Camiño de cumprirse seis meses do remate da folga da xustiza galega, paralizada durante tres longos meses, a Xunta de Galicia non puxo en marcha os prometidos plans de actuación para a recuperación das cargas de traballo. O propio TSXG fixo unha estimación de máis de 17.000 xuízos suspendidos, o que indica a magnitude da parálise sufrida.

Hoxe, de xeito sorpresivo, á porta dunha ponte festiva, e sen ningún día laborable  previo para informar aos traballadores, aparece a nova “oficiosa” de que o vindeiro LUNS, 15 DE OUTUBRO, empezará a SEGUNDA FASE dos devanditos plans, para os xulgados de Primeira Instancia / Social / Mercantil / exclusivos de violencia de A Coruña e Vigo; rexistro e reparto do TSXG e a oficina de notificacións e embargos de A Coruña.

Ter que agardar case medio ano é unha verdadeira vergoña: as cifras de moitos de estes xulgados, con cargas de traballo brutais, deberían ter sido motivo dabondo para que os plans de actuación comenzasen INMEDIATAMENTE tras rematar a folga, E NON  SEIS MESES DESPOIS.

o   O xulgado de violencia sobre a muller de A Coruña, de 4 asuntos pendentes de incoar no 2017, un ano despois acadou os 173. E de 49 escritos pendentes de proveer pasou a 301.

o   O xulgado de primeira instancia nº 6 de A Coruña, de 0 demandas por incoar acadou as 354. Os escritos por proveer pasaron de 151 a 722.

o   O xulgado de Instancia nº 3 de Ferrol é outra mostra: de 0 demandas por incoar pasa a 134, e de 72 escritos pendentes de proveer a 520.

o   O xulgado de primeira instancia nº 8 de Vigo pasou de 0 demandas pendentes de incoar a 72, e de 21 escritos a 729.

Nesta segunda fase, óbviase a situación dos xulgados do Penal, dos xulgados de Instrución, e dos xulgados do contencioso ou vixilancia penitenciaria, onde, en moitos deles, as cargas de traballo superaban en gran medida os módulos fixados polo Consello Xeral do Poder Xudicial, que tras a parálise ocasionada pola folga, alcanzan números que non se recuperarán en moitos anos. Para amosar o exposto, as estatísticas comparativas entre o segundo trimestre do ano 2017 e o segundo trimestre do 2018 son a mellor mostra de esta afirmación.

o   O xulgado de instrución 1 de Lugo pasou de 20 demandas por incoar no 2017 a 106 no ano 2018. E os asuntos complexos incrementáronse de 26 a 56 (máis do dobre).

o   O xulgado de Vixilancia penitenciaria de Lugo pasou de 31 expedientes sen incoar en 2017 a 421 no mesmo período de 2018. E, no número total de materias, de 677 a 1642 (non se precisan máis comentarios).

o   O xulgado do Penal 1 de Ourense, de 0 executorias  pendentes de incoar no ano  2017 pasou a 124 neste segundo trimestre de 2018.

Agardar todavía un mes para que estes órganos entren nos plans de traballo é un novo insulto por parte da Xunta de Galicia e dos asinantes do acordo.

E, como non, están as VILAS, cuxos plans de traballo se iniciarán o día 1 de decembro: DENTRO DE MES E MEDIO: Xulgados mixtos con competencias en violencia sobre a muller e que viron aumentada a súa carga de traballo exponencialmente, en proporcións de tanto por cento, serán os últimos en poder recuperar a carga de traballo por mor da folga.

Todo o exposto, demóstrase con cifras:

o   O xulgado mixto 1 de Cambados pasou de 0 demandas por incoar no 2017 a 211 no mesmo período do 2018, e nos escritos pendentes de proveer: 184 a 403.

o   O xulgado mixto 3 de Cambados (XULGADO DE VIOLENCIA) pasou de 30 demandas por incoar no 2017 a 262 no mesmo período de 2018. No número de escritos pendentes de proveer de 167 a 639.

o   O xulgado mixto 1 de Marín pasou de 0 demandas por incoar a 113 no mesmo período de 2018, e, nos escritos pendentes de proveer, de 25 no segundo trimestre de 2017 a 383 no mesmo período de 2018.

o   O xulgado único de Ortigueira, de 0 demandas pendentes de incoar no 2017 pasou  a 183 no segundo trimestre de 2018.

o   O xulgado mixto 3 de O Porriño (XULGADO DE VIOLENCIA) das 12 demandas pendentes de proveer no segundo semestre de 2017 pasou a 113 no mesmo período de este ano. E de 208 escritos pendentes de proveer a 978.

o   O caso do xulgado mixto 2 de Redondela (XULGADO DE VIOLENCIA) é tamén destacable: de 0 demandas por incoar en 2017 a 209 no mesmo período de 2018, e de 257 escritos pendentes de proveer a 1.077 un ano despois.

Cos datos estatísticos do propio CXPX que imos xuntar, deixaremos en evidencia a falta de estudio das cargas de traballo por parte da Xunta.

Os plans de actuación son XENÉRICOS, sen distinción:

‾    Sen distinción por carga de traballo, xa que exclúen xulgados moi prexudicados.

‾    Seguimento da folga: inclúe xulgados onde o seguimento da folga foi nulo.

MÁIS DE CEN XORNADAS DE TRABALLO PERDIDAS QUEDAN “SANEADAS”, PARA ELES, NESTES MÍSEROS PLANS (MÍSEROS EN DURACIÓN) E MÍSEROS POLO TEMPO PASADO PARA A SÚA APLICACIÓN.

Estatísticas

http://www.alternativasxustiza.com/2018/10/os-plans-de-actuacion-en-cifras-ignoran.html