O vindeiro mércores 3 de outubro, Jorge Correa “Boro”, xornalista de La Haine, enfróntase a un xuízo polo que a Fiscalía pide seis anos de prisión por supostos delitos de lesións e atentado á autoridade polos feitos acontecidos o pasado 29 de marzo de 2014 en Madrid ao termo da manifestación Xaque á monarquía, onde diferentes medios foron agredidos pola Policía Nacional.

Boro denunciou nunha rolda de prensa xunto a outros represaliados por ataques á liberdade de expresión como Ruben Ollo “Olazti”, da Plataforma pola Absolución das persoas procesadas pola Operación Araña, e Miguel Ángel Llamas “Pitu”, do medio Ahotsa.info, o “flagrante atentado contra a liberdade de prensa e información” e a actuación policial “violenta e irresponsable” daquel día , uns feitos que “ata a división de liberdade de prensa da OSCE (Organismo Europeo de Control de Dereitos Humanos e liberdades democráticas) denunciou ante as inxustificadas agresións que se viron reflectidas nos distintos vídeos do acontecido”.

O pasado 22 de febreiro produciuse o primeiro xuízo derivado destes feitos tras a denuncia que os xornalistas Juan Ramon Robles, Mario Munera, Gabriel Pecot e Rodrigo García puxeron á Policía polas agresións e lesións recibidas, un xuízo no que quedou probado que polo menos un dos axentes agredira inxustificadamente aos xornalistas, aínda que o Tribunal non o condenou por estar o delito prescrito. Aquela tarde os axentes ían sen identificar e trala denuncia interposta a Policía obstaculizou a súa identificación.

O segundo xuízo celebrarase o vindeiro mércores, a pesar de que debía realizarse o pasado mes de abril, pero foi aprazado porque “un dos axentes enviou un fax anunciando a súa indisposición unha hora antes de comezar a vista”. “Uns días antes difundiuse un vídeo que botaba por terra toda a versión policial na que se ve que non houbo ningunha agresión pola miña banda”, asegura Boro, que denuncia que “non só non houbo agresión pola miña banda senón que o que se pode ver é que as supostas lesións presentadas puideron ser causadas por eles mesmos mentres agredían ao grupo de xornalistas”.

“Este caso constitúe un novo ataque ao dereito á libre información ademais dunha persecución contra un medio, lahaine.org, que leva 18 anos informando de loitas sociais e denunciando os abusos policiais”, denuncia Boro, que ata agora recibiu as firmas de apoio de 125 xornalistas, 50 medios de comunicación, 100 organizacións, colectivos ou partidos políticos e máis de 1.500 adhesións persoais. Ademais o Sindicato de Xornalistas de Madrid, a Federación Española de Sindicatos de Xornalistas, o Foro de Organizacións de Xornalistas e o propio Parlamento de Navarra pediu en distintas declaracións a súa absolución e a investigación das agresións á prensa ocorridas aquela tarde de marzo en Madrid.

Entre o venres e o mércores sucederanse diferentes concentracións en apoio ao xornalista en varias cidades do estado español.

Imaxe de portada: O xornalista Boro LH tras a rolda de prensa ofrecida en Iruñea Jone Arzoz

https://www.elsaltodiario.com/montajes-policiales/periodista-boro-lh-juicio-miercoles-seis-a%C3%B1os-prision-jaque-monarquia-la-haine