Esta fin de semana, venres día 15 e sábado 16, participamos no festival organizado por Elviña Sons no que, unha diversidade importante de colectivos, tivemos espazo para colocar mesas nas que expoñer o material que producimos. No espazo reservado, entre outros estaban presentes o Centro Social Autoxestionado A Comuna, Acción Antifascista da Coruña, o Comité de Solidariedade cos Pesos Políticos... Apoiamos, tamén, no que puidemos, en labores de intendencia, o desenvolvemento do festival.

A nosa relación coa mocidade de Elviña, organizada en Elviña non se Vende, colectivo no que participa un bo número de veciñas e veciños do pobo e no que se integra un grupo amplo de mozas e mozos moi activos socialmente, deriva das accións que como STOP Desafiuzamentos desenvolvemos apoiando ás persoas afectadas polos desafiuzamentos provocados pola afectación do denominado Parque Ofimático. Os lazos estreitáronse durante o desaloxo da vivenda de Isabel e Álvaro Corral, a finais do ano 2014.

O compromiso social da mocidade que organiza o festival reflíctese tanto na programación dos actos que se desenvolven nos dous días de duración, como n@s artistas participantes así como na finalidade que se lle asigna ao pouco diñeiro que se recada – nas dúas últimas edicións destinado ao pobo palestino, en anos anteriores serviu para axudar a pagar as múltiples e cuantiosas multas impostas polas accións contra os desafiuzamentos no pobo e o desaloxo antes mencionado.

Nesta 5ª edición do festival, durante a actuación de Pablo Hasel, Acción Antifascista da Coruña, subiu ao escenario unha pancarta reivindicando a liberdade de expresión. Na actuación de KonfliKto, encheuse o escenario coa protesta polo desaloxo do CSOA A Insumisa. Posteriormente, durante a actuación de Rat-Zinger, o escenario volveu a ser ocupado por Acción Antifascista para mostrar a solidariedade coas mozas e mozos de Altsasu.

Como sabedes a redacción do PASquín conformámola un número moi reducido de persoas. A actividade extraordinaria que realizamos esta fin de semana impídenos abordar unha edición máis ampla.

Agardamos a vosa comprensión

ACCIÓN ANTIFASCISTA DA CORUÑA - CONTRA O ESTADO POLICIAL!!. LIBERDADE DE EXPRESIÓN!!

ACCIÓN ANTIFASCISTA DA CORUÑA - ALTSASU LIBERDADE!!

CSOA A INSUMISA. EN DEFENSA DOS ESPAZOS LIBERADOS!!

ELVIÑA NON SE VENDE!!!!