Ahmed Yassin, tetrapléxico en cadeira de rodas, con 90% do corpo paralizado, dedicou a súa vida enteira a organizar a resistencia Palestina e de feito foi protagonista principal da constitución de Hamas.

Marzo de 2004 un francotirador disparoulle a cabeza mais o tiro deulle no brazo dereito. Os israelís recoñeceron que fora un intento fallido de “execución selectiva”.

Tres dias despois, un avión F-16 lanzou unha potente bomba contra a casa de Yassin en Gaza e, amais de acabar coa súa vida, deixou nove persoas malferidas das que tres faleceran decontado. Os israelís proclamaron o éxito desta segunda “execución selectiva”.

Ibrahim Abu Turaya, de 20 anos, perdera as pernas na ofensiva aérea con bombas de fósforo contra Gaza, en 2008, e, en decembro de 2017, lanzaba pedras en cadeira de rodas contra a tropa de ocupación de Palestina. Dende 30 metros de distancia, un soldado disparoulle un tiro mortal de necesidade na cabeza.

Luns pasado, 14 de maio, entre os 35.000 manifestantes de Gaza, de novo un palestino en cadeira de rodas foi atinxido por un disparo letal na cabeza. Estaba desarmado, coma as outras setenta mulleres e homes palestinos asasinados de bala, entre eles 20 menores, e os case tres mil feridos.

A información dominante ignora o crime en serie contra un pobo desarmado fronte a acumulación de armas dos colonizadores, clientes de primeira e probadores preferentes da colosal industria da guerra dos Estados Unidos; presentan a guerra coma unha retesía entre veciños e non mencionan o feito central da ocupación da terra de Palestina, comezada por un decreto colonial británico e continuada polo imperio norteamericano coa intención de manter o dominio xeo-estratéxico sobre Oriente Próximo.

A ocupación colonial e a desproporción de forzas contra o pobo palestino mantense grazas a impunidade, garantida no Consello de Seguridade da ONU, mediante veto de Estados Unidos, Inglaterra e Francia.

E a ausencia de castigo exténdese coma unha peste moral sobre todo o mundo, porque se ninguén paga a lista de infamias cometidas en Palestina, esa compaña do crime impune medra contra Afganistán, bombardea Siria, salta polos aires Libia, rompe o sur do Líbano, rouba Iraq, rebenta Belgrado, amasa en sangue Sudán, arruina Yemen, bloquea Cuba e Venezuela ou inventa armas de apocalipse contra calquera territorio convertibel en mercadoria.

Vivimos en directo a metáfora de Bertold Brecht sobre quen gardou silenzo perante o crime cometido contra o seu veciño inocente, para ser depois obxecto da mesma inxustiza.

DEFENDAMOS O POBO PALESTINO CERCADO!!

ACABEMOS COA OCUPACIÓN DE PALESTINA!!,

REMATEMOS COA IMPUNIDADE DOS COLONIZADORES DE PALESTINA!!

PALESTINA VENCERÁ!!