Hoxe, venres 18 de maio, escenificouse a rendición total dos sindicatos do sistema, asinando o acordo que previamente estiveran negociando ás costas das traballadoras e traballadores e mesmo do propio Comité de Folga ao que nin sequera informaron das xuntanzas que estaban a realizar.

Posteriormente, pensando que se eles se rendían o colectivo iría detrás procederon á realización dunha votación na que os traballadores e traballadoras lles mostraron cal era o camiño que había que percorrer na defensa da súa dignidade.

Nese intre, o dano xa estaba feito. As artimañas do sindicalismo traidor e a ruptura da unidade sindical provocaron unha fenda irreparable no colectivo. Aínda así, as mobilizacións continuaron.

É importante que desta prolongada e activa loita tiremos conclusións, aprendamos a identificar a quen defende os nosos dereitos e intereses e illemos aos que, unha vez máis, venderon unha magnífica loita por un prato de lentellas, porque, que non se lograran os obxectivos de tanta loita ten culpables.

A escoura sindical rematou coa súa pantomima aos 101 días do comezo da loita plasmando no papel unha rendición que xa realizaran hai semanas, asinando un “acordo” rexeitado polas traballadoras e traballadores. Rueda xa ten a foto que buscaba desde hai 101 días. Que non se engane o sr. conselleiro, a folga non se desconvocou, na medida en que non se conseguiron os obxectivos a loita continuará, entrará nunha nova fase de acumulación de forzas para reaparecer con máis forza que a demostrada. Desta vez as traballadoras e traballadores xa saberán con quen non xuntarse.