O desmantelamento do Diario Cultural tal e como se coñecía despois de 28 anos de emisión na Radio Galega está provocando unha enorme vaga de reaccións no mundo da cultura. Asociacións profesionais, intelectuais, xornalistas, escritoras, deputadas ou organizacións políticas amosan a súa indignación e rexeitamento nas redes sociais e en comunicados.

A Asociación de Escritores e Escritoras en Lingua Galega emitiu unha declaración en que se dirixe á dirección da radio pública para “demandar a continuidade do Diario Cultural” e amosar “o seu apoio a toda a equipa do programa dirixida pola poeta e xornalista Ana Romaní”. “Eliminan un recoñecido programa, emblemático, e diminúe deste xeito a xa cativa programación sobre a nosa cultura e a nosa literatura”, engade.

A asociación tamén critica que a emisora anuncie “a desaparición de dous informativos diarios, cos seus contidos culturais, que se facían desde as delegacións locais da Coruña, Vigo, Lugo e Ourense”. “As realidades locais, nas que se incardina tanta da nosa cultura, e os creadores e creadoras que dan forma á nosa biodiversidade cultural, ficarían minorizadas”, di, “esta mudanza empobrece de xeito determinante o conxunto da Radio Galega”.

A Asociación Galega de Editoras pronunciouse vía twitter, medio a través do que reivindicou “a permanencia do Diario Cultural na Radio Galega polo seu apoio á difusión do libro galego”. A Mesa pola Normalización Lingüística “súmase ao clamor para que se manteña” o programa. Como o fixeron Escena Galega, “a asociación de referencia para o sector profesional das artes escénicas”, e a Asociación de Xestores Culturais. Ou empresas editoriais como Kalandraka e Apiario.

Na esfera política

A esfera política non permaneceu allea á indignación desatada pola decisión unilateral da dirección da Radio Galega. O BNG lamentou a supresión crecente de “voces e contidos críticos” da grella radiofónica e “o uso absoluto da CRTVG ao servizo” do PP. Compostela Aberta dixo tratarse doutro “paso máis no exterminio de toda illa de diversidade e pluralidade nos medios públicos”. A Deputación da Coruña falou no mesmo sentido.

A portavoz nacionalista Ana Pontón, a eurodeputada do Bloque Ana Miranda, o alcalde de Compostela Martiño Noriega (Compostela Aberta), a dirixente socialista Mercedes Rosón ou o deputado no Congreso de En Marea Miguel Anxo Fernán Vello tomaron partido en defensa da conservación do Diario Cultural. E ducias de escritores, escritoras e xornalistas activos nas redes sociais deron percorrido aos hashtags #SalvemosODiarioCultual e #QueremosDiarioCultural.

Sermos Galiza

Manifesto

Os medios de comunicación públicos son patrimonio de todas, de todos: Nós non imos ficar caladas!

Ningunha dirección é propietaria do Diario Cultural.

Despois de 28 anos de traxectoria, este espazo é un referente, patrimonio de todas, de todos os galegos.

A existencia de medios de comunicación públicos é un gran triunfo colectivo desta sociedade, un instrumento definitivo para o futuro da propia lingua.

A súa aparición tivo uns resultados e unha incidencia social espectaculares. Entre outros moitos argumentos positivos, permitiu a difusión do talento de miles de artistas que decidiron desenvolver en galego a súa creatividade.

A expresión máxima desta revolución da intelixencia é o Diario Cultural. Un espazo caracterizado pola calidade na forma e nos contidos, que definiu un estilo de seu. Un contorno de comunicación que acolle, e co que se senten identificad@s, a inmensa maioría das creadoras e creadores deste país.

En resumo, un modelo propio, que nos permite recoñecérmonos e dialogar, en pé de igualdade, con todas as culturas do mundo.

A desaparición do Diario Cultural súmase á supresión dunha boa parte da programacion cultural da radio e a televisión públicas, como aconteceu con Libro Aberto, Planeta Furancho, Onda Vital, Alalá ou Eirado.

Cómpre lembrar que a Radio Galega non foi creada para traducir as axendas e os contidos das cadeas estatais. A Radio Galega naceu para ser o referente primeiro da literatura, da música, do teatro, do cinema, das artes plásticas, de todas as formas de cultura que produce esta sociedade. Exactamente como leva facendo, dun xeito espléndido, dende hai 28 anos, o Diario Cultural.

Por iso, alén doutras consideracións, a súa desaparición supón un ataque frontal á propia lei. Velaí o punto un do artigo primeiro da lei de Creación da Compañía da RTVG:

Atribúeselle á Compañía de Radio-Televisión de Galicia a misión de servizo público consistente na promoción, difusión e impulso da lingua galega, así como a atención á máis ampla audiencia, ofrecendo calidade e a máxima continuidade e cobertura xeográfica, social e cultural, propiciando o acceso aos distintos xéneros de programacións e aos eventos institucionais, sociais, culturais e deportivos, dirixíndose a todos os segmentos de público, idades e grupos sociais, e favorecendo activamente a difusión cultural, intelectual e artística e dos coñecementos cívicos, económicos, sociais, científicos e técnicos mediante toda clase de emisións en lingua galega realizadas por dita Compañía a través das sociedades Radiotelevisión de Galicia, S.A. e Televisión de Galicia, S.A., así como de calquera outra que poida crear no futuro.

A pesar deste mandato, a Radio Galega é cada vez menos galega, tamén en materia xeográfica. A carón da desaparición do Diario Cultural, anúnciase a eliminación das desconexións locais cos contidos propios de cada cidade e das súas áreas de influencia. Curioso paradoxo, o medio que, por definición, debería informar máis de preto, desatende o contorno máis próximo.

Cómpre lembrarlle aos actuais responsables que non dirixen unha compañía privada -este medio é propiedade de todas e todos- e deben cumprir a lei.

E cómpre lembrarlle tamén ao conxunto da sociedade que temos o dereito e deber de demandarllo.

Nós non imos ficar caladas.

Nin silencio, nin barbarie:

Longa vida á creatividade e ao talento.
Longa vida ao Diario Cultural!

Grupo promotor do manifesto:

Xurxo Souto

Ledicia Costas

María Reimóndez

Manuel Bragado

Cesáreo Sánchez Iglesias

Rosalía Fernández Rial

Eli Ríos

Mercedes Queixas

Margarita Ledo Andión

María Xesús Nogueira

Fran Alonso,

Manuel Rivas,

Dores Tembrás

Xiana Lastra

Marcos Maceira

Suso de Toro

Asina, bótanos unha man!

Manifesto

 https://nosnonimosficarcaladas.wordpress.com/apoio-o-manifesto/