A pesar dun intento de sabotaxe no que alguén meteu unha lata de cervexa no medio de material cirúrxico, as traballadoras e traballadores do hospital de Monforte de Lemos continúan coa folga indefinida iniciada de tódolos martes e xoves e que iniciaron o 24 de abril. A aparición desa lata de cervexa foi cualificada polos traballadores e traballadoras como un intento de sabotear a súa mobilización e esixen unha áxil e completa investigación deste feito,

Os traballadores e traballadoras do hospital de Monforte de Lemos comezaron o martes 24 de abril unha folga indefinida os martes e xoves polas malas condicións de traballo dos sanitarios, as deficiencias do hospital e a falta de cobertura dos especialistas, cuestións que provocan "graves consecuencias" nos pacientes.

As traballadoras e traballadores reclaman a contratación dos profesionais e a súa incorporación ao cadro de persoal, e que se faga con boas condicións e non con contratos temporais a media xornada, que o que conseguen é que o hospital quede sen persoal.

O persoal do hospital reiterou que "non queren traballar menos e cobrar máis" pero si traballar o mesmo con boas condicións. Denuncian que a xerencia do hospital de querer "facer máis con menos" e converter "aos traballadores en máquinas e aos pacientes en números".

Unha situación que os empregados non están dispostos a consentir e que aseguran "trae consecuencias graves aos pacientes".