Traballadores do servizo de farmacia do Chuac manifestáronse arredor do hospital para reclamar un incremento de persoal xa que, segundo aseguran, a sobrecarga esta xerando atraso na entrega das medicacións ademais de problemas de seguridade e custodia farmacolóxica. A protesta finalizou na xerencia, onde a responsable da área sanitaria, Luís Verde, saíu a atender ao colectivo e comprometeuse a tentar buscar solucións.

Os traballadores lembraron que nos últimos dez anos a centralización do servizo de Farmacia para mellorar a xestión e eficacia incrementou a carga laboral, posto que se serve a todas as unidades de catro hospitais, incluídos os hospitais de día de oncoloxía, a 60 centros de saúde, 11 PAC e 23 residencias de maiores e centros de discapacidade, de modo que o persoal de celadores e técnicos «é totalmente insuficiente», sinalou María Seijo, presidenta da comisión de centro, que tamén lembrou que a protesta non foi convocada polos sindicatos, senón polo persoal da farmacia, que trasladou un informe cos problemas xa no ano 2015.

Os traballadores manterán as concentracións todos os luns e venres de maio e se non se resolve, o 1 de xuño irán á folga.

A xerencia sinalou que a xefa do servizo convocou reunións cos profesionais para buscar saídas ao conflito nunha unidade na que traballan 92 profesionais e que, segundo recalcou a responsable, conta con certificados de calidade que acreditan o funcionamento. Ademais, subliñou que «a calidade asistencial, seguridade e trazabilidade dos medicamentos está plenamente garantida» e lembrou que a dotación do servizo, que conta cun proxecto de ampliación en marcha, foise adaptando ás novas necesidades, coa incorporación nos últimos catro anos de  2 farmacéuticos, 1 administrativo, 2 enfermeiras e 8 técnicos. 

La Voz de Galicia