O Comité para a Eliminación da Discriminación Racial da Organización de Nacións Unidas (ONU) deu un ‘toque' a España por restrinxir o acceso á súa sanidade pública dos inmigrantes sen papeis a raíz do decreto 16/2012 publicado en abril dese ano.

Os seus integrantes –18 especialistas independentes oriúndos de diversas nacionalidades– reclaman ao goberno español que restaure a asistencia sanitaria pública universal e que revise, igualmente, o rexeitamento sistemático das súas autoridades fronteirizas aos migrantes e refuxiados.

A normativa aprobada no seu día polo actual goberno en funcións fixou por decreto a extinción da atención sanitaria gratuíta a inmigrantes que se atopen en situación irregular en España. Nese punto do decreto céntrase agora o aviso do organismo comunitario, que desconfía da existencia en España dunha sanidade universal, menos aínda no caso destas persoas.

Saúde e integridade dos migrantes

Así mesmo, do mesmo xeito que fixeron xa o Comité de Dereitos Humanos e o Comité contra a Tortura, os expertos da ONU instaron ao Estado a investigar de maneira “pronta, eficaz, completa e transparente” as alegacións de uso excesivo da forza por parte das forzas de seguridade en operacións de expulsión, incluíndo o Tarajal, onde o 6 de febreiro de 2014 morreron 15 inmigrantes.

Nun documento ao que tiveron acceso as axencias de noticias, o Comité expresa “a súa grave preocupación pola práctica de devolucións sumarias por parte das forzas de seguridade españolas na liña fronteiriza da demarcación territorial de Ceuta e Melilla”, e recomenda revisar a Lei de Seguridade Cidadá no que se refire ao ‘rexeitamento en fronteira' así como garantir o acceso a procedementos de asilo a todas as persoas susceptibles de protección internacional.

Informe do Comité para a Eliminación da Discriminación Racial da ONU

Redacción Médica