Se os traballadores do Metro gañan gañamos todos os traballadores!

Os que escribimos isto somos usuarios do Metro de Madrid, traballadores/as coma ti. Nestes días escoitarías afirmacións coma "É unha folga salvaxe e non se respecta o dereito ao traballo"; "A quen máis prexudica unha folga así é aos traballadores"; "É unha chantaxe e os usuarios somos reféns". Despois a prensa e os políticos (tanto do goberno de Zapatero coma o de Esperanza Aguirre) airean a bombo e prato frases como esas sen máis interese que criminalizar aos folguistas e poñer aos usuarios en contra dos traballadores/as do Metro.

E nós preguntámonos Por que se acordan do dereito ao traballo só cando hai folgas? Non hai que ter moi pouca vergoña para que nos falen do dereito ao traballo os que son responsables directos ou cómplices de que neste país teñamos cinco millóns de traballadores no paro? Por que non saen a esixir irados o dereito ao traballo destes cinco millóns de parados?

Os gobernos regalan fortunas aos banqueiros mentres aos traballadores nos recortan os salarios, sóbennos o IVE, métennos unha reforma laboral ou un pensionazo, e se protestas ou non pagas a hipoteca vas á rúa.

Hai que ter moi pouca vergoña, como Gallardón, para dicir "hai que cumprir a Lei" cando o conflito o orixina precisamente o incumprimento pola súa parte da Lei, é dicir do convenio colectivo vixente.

Os traballadores do Metro están en folga, perdendo diñeiro cada día de paro, arriscándose a ser sancionados ou despedidos, porque hai en xogo moito máis que un 5% de baixada de salarios, que non é pouco, hai en xogo o lexitimar que as empresas se pasen por "o arco do triunfo" os convenios asinados e che baixen o salario ou te cambien as condicións de traballo cando lles dea a gana. Iso é o que está en xogo!

Zapatero e Esperanza Aguirre coa súa reforma laboral, despedimentos, plan de axuste e pensionazo non só nos queren pobres e sen dereitos senón que ademais nos queren submisos e resignados. Cando se establecen servizos mínimos abusivos impídese de feito o dereito á folga. Cando se criminalizar aos traballadores/as do Metro e lles abren 400 expedientes o que se pretende é un castigo exemplar para que a todos os traballadores se nos quite da cabeza facer folga algunha.

Por iso cando sintas, coma nós, que é unha faena que non haxa Metro, que é un trastorno enorme, acórdate que a reforma laboral que nos están a meter, iso si que é, se non o evitamos, un trastorno irreversible; mandar millóns de traballadores ao paro é un trastorno dramático; que nos queiran prolongar a idade de xubilación aos 67 anos e baixarnos a pensión, iso si que é un trastorno vergonzoso.

Se os traballadores do Metro logran gañar, que se respecte o seu convenio e polo tanto se bote atrás o plan de recortes de Zapatero e Esperanza Aguirre, será un importante precedente para todos. Por iso dicimos: se os traballadores do Metro gañan, gañamos todos os traballadores.

Apoiamos esta lexítima folga e manifestamos toda a nosa simpatía e solidariedade cos traballadores e traballadoras do Metro. Sacar o conflito á rúa, dirixirse a todos os traballadores/as de Madrid, e todo o territorio do Estado, buscar a unidade con outros sectores en loita e explicar a súa. Para todo isto, téñennos ao seu lado.

Trátase de que xuntos, usuarios e traballadores/as do Metro, esixamos a inmediata solución do conflito, que non pode ser outra que o respecto ao convenio e a retirada de todos os expedientes abertos.