Segundo a Enquisa Anual de Estrutura Salarial do Instituto Nacional de Estatística (INE), as retribucións anuais das mulleres representaron en 2008 o 78,9 por cento da ganancia media anual masculina, unha porcentaxe superior ao cociente estatal, cifrada en 78,1 por cento.

O salario bruto anual en Galiza alcanzou en 2008 os 19.156,41 euros, de forma que se situou como a cuarta comunidade cos soldos brutos anuais máis baixos, ao superar só a media salarial de Estremadura, con 18.264,90 euros; Canarias, con 18.466,99 euros; e Murcia, con 18.911,75 euros.

A ganancia media anual en todo o país por traballador foi de 21.883,42 euros o ano referido, o que supón un incremento do 7,3 por cento respecto de 2007, e o salario máis frecuente ascendeu a 15.500 euros.

Por comunidades autónomas, os salarios máis elevados corresponderon en 2008 a País Vasco (25.547,18 euros anuais por traballador), Comunidade de Madrid (25.269,61 euros) e Catalunya (23.375,54 euros). Estas tres comunidades, xunto con Navarra, presentaron unha ganancia media anual superior á media estatal.

Seguen a Galiza en canto aos salarios brutos anuais, Castela-A Mancha (19.736,3 euros), Comunidade Valenciana (19.793,6 euros) e Andalucía (20.138,5 euros).

Datos estatais

A nivel estatal, o soldo medio anual das mulleres é un 21,8 por cento inferior ao dos homes, xa que mentres as primeiras se embolsan anualmente 18.910,62 euros, os segundos gañan 24.203,33 euros ao ano.

Así, a ganancia media anual feminina representou o 78,1 por cento da masculina en 2008, unha diferenza que, con todo, se reduce se se consideran situacións similares respecto de variábeis tales como tipo de contrato, de xornada, ocupación e antigüidade.

O INE subliña que a desigualdade salarial é apreciábel se se ten en conta ademais que o 8,1 por cento das mulleres tiñan ingresos salariais menores ou iguais que o Salario Mínimo Interprofesional (SMI) en 2007, mentres que só o 2,9 por cento dos homes se atopaba nese intervalo.

Tomando en consideración salarios máis elevados, o 20,6 por cento dos homes presentaron uns ingresos cinco veces superiores ao SMI, fronte ao 12,1 por cento das mulleres.

En case todas as comunidades autónomas, o salario medio das mulleres foi entre un 20 por cento e un 30 por cento inferior á ganancia media dos homes. As maiores diverxencias de ganancias entre ambos os sexos producíronse en Asturias e Aragón.

Analizando as diferenzas salariais para cada actividade económica, as mulleres tiveron un salario inferior ao dos homes en todas elas, sendo a educación a actividade na que as diferenzas son menos acentuadas.