O Proxecto dos Orzamentos Xerais do Estado presentado polo Goberno o pasado 4 de abril “reflicte un modelo económico baseado en actividades produtivas pouco intensivas en tecnoloxía, depredadoras do medio ambiente, que non atende ás necesidades sociais e que agrava os problemas de desigualdade social, particularmente entre homes e mulleres”. Así o denuncian desde a Plataforma Impacto de Xénero Xa! nun manifesto que presentaron este xoves no Congreso dos Deputados.
 
Para esta organización, o gasto social, ademais de escaso “”, promove “unha estrutura laboral/familiar atravesada pola división sexual do traballo“. Neste sentido, engaden que se potencia “un mercado de traballo altamente segregado por sexos e unha familia na que os homes se ven presionados a se manter afastados dos coidados e as mulleres para abandonar os seus empregos para coidar o seo do fogar”. “É significativo que o permiso de paternidade, orzado en 439 millóns de euros, sexa a cuarta parte que o de maternidade (4 semanas fronte a 16 semanas)”, engaden. Sobre o Sistema de Atención á Dependencia, ven rechamante que “sexa inferior ao gasto en desgravacións e prestacións para o coidado ‘familiar’ de dependentes no fogar”.
 
A Plataforma Impacto de Xénero Xa! insiste en que “este sistema é antisocial, ineficiente e insustentable” xa que consideran que non se garante o dereito á educación, a unha atención pública á dependencia e que as mulleres non contan cun “ingreso digno que lles permita ser independentes economicamente”. Segundo o seu manifesto, ademais, as contas públicas “agravan a crise demográfica e a crise ecolóxica“.
 
“O Informe Oficial de Impacto de Xénero adxunto por 9º ano ao Proxecto de Orzamentos 2017, segue, como os anteriores, sen analizar a contía de euros dos programas orzamentarios analizados, cuestión esencial do orzamento, e refírese aos obxectivos do Plan Estratéxico de Igualdade 2014-2016 xa finalizado, ademais de omitir a valoración do impacto de xénero dos tributos e outros ingresos, e da maioría dos gastos, en particular os da Seguridade Social, ignorando a brecha de xénero nas pensións e os de atención á infancia e ás persoas en situación de dependencia”, denuncian desde a plataforma
 
Xornal La Marea