A Federación Sindical Mundial -FSM- , con miras ao Día Internacional do Traballo do 1º de maio, envía os seus saúdos militantes aos traballadores de todo o planeta, quen, comprometidos cos seus sindicatos, loitan pola satisfacción das súas necesidades contemporáneas.
 
O primeiro de maio é un fito para os traballadores de todo o mundo; desde 1886 as reivindicacións dos traballadores inmigrantes de Chicago seguen sendo actuais. Hoxe en día, a súa loita segue na batalla dos traballadores por unha vida e traballo digno, con dereitos, seguridade, educación e saúde gratuíta. Como entón en Chicago, cando os traballadores inmigrantes dos EEUU estaban de pé na primeira liña das loitas clasistas, tamén agora, os millóns de traballadores inmigrantes poden, a través da súa participación activa e militante nos seus sindicatos, fortalecer as loitas clasistas en contra da barbarie capitalista.
 
Este ano estivo marcado polo agravamento das rivalidades interimperialistas que non só incrementan a explotación dos pobos, senón tamén expoñen o risco dunha guerra xeneralizada. Os acontecementos en África, Oriente Próximo, Asia e Europa demostran a agresividade do Capital en contra do movemento obreiro, conducen a miles de persoas a migrar a fin de escapar das guerras e ao mesmo tempo a UE e os gobernos dos países de Europa finxen que queren axudar á supervivencia dos inmigrantes.
 
Os traballadores de todo o mundo están preocupados pola agresividade do goberno estadounidense, dos países da OTAN e dos seus aliados que, para gañar novos mercados e desposuír a todos os países das súas riquezas, bombardean ao pobo de Siria, matan a nenos en Palestina, empuxan ao pobo de Venezuela a un conflito civil, ameazan con facer uso de armas nucleares na península de Corea. Os que hai uns días lanzaron en Afganistán a bomba non nuclear máis potente do seu arsenal son os mesmos imperialistas que apoian e colaboran co goberno de Ucraína apoiado tamén por fascistas; son os mesmos que apoian e toleran as políticas de Israel en Oriente Próximo.
 
Estas rivalidades internacionais interimperialistas empeoran aínda máis a situación económica dos traballadores e dos pensionistas. Hai unha arremetida xeneralizada contra os salarios e as pensións, unha ofensiva de privatizacións da seguridade social, da Saúde e Educación Pública, un aumento do desemprego, do traballo “negro” e das limitacións de liberdades sindicais. Neste contexto, a clase traballadora e os pobos están a prepararse pola celebración militante do primeiro de maio de 2017.
A Federación Sindical Mundial, fai un chamamento a todos os seus amigos e afiliados en cada recuncho do mundo para que conmemoren por calquera medio e maneira o Día Internacional dos Traballadores, unindo as súas voces e gritando:
 
“Organizamos a nosa loita en contra da barbarie imperialista, polas necesidades contemporáneas do pobo e da mocidade, por un mundo sen explotación e guerras”.
 
A FSM, en representación de 92 millóns de traballadores en cada continente do mundo, reitera a súa solidariedade internacionalista co pobo heroico de Cuba que será o anfitrión da reunión do Consello Presidencial da FSM do 3 ao 5 de maio 2017, así como con todos os traballadores do mundo que loitan en contra da agresividade imperialista.
 
Neste 2017, despois da celebración do 17º Congreso Sindical Mundial, a FSM sae fortalecida, con novas forzas, con novas organizacións e, sobre todo, coas súas decisións.
 
Organizamos con maior dilixencia e intensidade a nosa acción en cada país, en cada continente pola emancipación da clase traballadora; seguimos a loita polos nosos dereitos e necesidades en contra do sistema de explotación que xera pobreza, guerras e ondas de refuxiados.
 
Os invencibles non son os inimigos dos pobos, senón os propios pobos que loitan