Mentres a corrupción política, xudicial e empresarial, a falta de garantías xudiciais para as persoas máis necesitadas e a conivencia delituosa entre poderes públicos campan ás súas anchas, evidenciando con claridade o saqueo ás arcas públicas que levaron a cabo, a clase traballadora debátese entre a desesperación de non poder desenvolver proxectos de vida dignos e a maior precariedade das condicións laborais e sociais, onde a pobreza e a desigualdade esténdense en cada vez maiores capas da sociedade.
 
As cifras de persoas desempregadas, sobre todo xoves e mulleres, seguen sendo inaceptables; a gran maioría dos novos contratos son temporais, con salarios de miseria e condicións laborais de escravitude, e os ERE son a única saída que atopa a reaccionaria clase empresarial que sufrimos neste estado.
 
Os “axentes sociais do réxime” tratan de saír do seu “agocho” de anos, co único afán de volver traizoar á clase que din representar e asinar outro Pacto Social co goberno e a patronal que nos recorte aínda máis os noso salarios e dereitos. Ademais de volver “retocar” o Pacto de Toledo, para recortar aínda máis as xa precarias Pensións Públicas.
 
Para nós está claro que a loita na rúa é a única vía para conseguir recuperar as conquistas laborais e sociais que nos quitaron, para levar a cabo transformacións sociais e para defender o que é patrimonio da colectividade, é dicir “o Público, o Común”, os Servizos Públicos como dereitos esenciais de todas as persoas.
 
Chamamos este 1º de Maio a todas as persoas, organizacións e colectivos sociais, aos migrantes, ás pensionistas, aos estudantes, ás mulleres, ás desfiuzadas das súas casas e dos seus empregos, ás represaliadas por loitar, á clase traballadora en xeral, a manifestarse desde a dignidade de clase para exercer o dereito á protesta que pretenden eliminar, a través de Sentenzas condenatorias para quen loita e Sentenzas do máximo tribunal español (o Tribunal Supremo), que legalizan a esquirolaxe cando se convocan Folgas para defenderse das agresións empresariais. Para nós, cada agredida, cada sancionado, cada condenada, cada reprimido polos poderosos é un motivo máis para seguir nas rúas.
 
Por iso, esiximos neste 1º de Maio:

• A derrogación da Reforma Laboral e uns empregos estables con salarios e condicións dignas.

• A derrogación das leis Mordaza e a posta en liberdade e o sobresemento das causas contra todas as persoas encarceradas, procesadas ou multadas por loitar.

• Establecemento de rendas mínimas que garantan a dignidade.

• Non rotundo ao pago da débeda ilexítima

• Uns Servizos Públicos que sexan Dereitos Esenciais das persoas e a paralización da política de recortes e privatizacións dos servizos públicos e os ataques ao Sistema Público de Pensións, sanitario ou de ensino.

 
Este 1º de Maio estamos nas rúas, confluíndo os sindicatos de combate cos movementos sociais e colectivos en loita ou coas súas propias enerxías e xentes, reivindicando un cambio de modelo social baseado na repartición da riqueza e do traballo, no apoio mutuo e na igualdade.
 
VIVA A LOITA DA CLASE OBREIRA!
VIVA O PRIMEIRO DE MAIO!