A presenza das empresas do Ibex en paraísos e nichos fiscais vai en aumento. Esa é a conclusión á que chega o Observatorio de Responsabilidade Social Corporativa, unha organización sen ánimo de lucro que, desde 2004, realiza exhaustivas análises sobre a transparencia fiscal das grandes empresas españolas en base á información que trasladan aos investidores e á CNMV.
 
O último informe, que analiza as memorias anuais e outros documentos correspondentes ao exercicio 2015, consagra a Delaware como o paraíso fiscal favorito do Ibex. As empresas do selectivo sumaban 463 filiais domiciliadas no estado norteamericano. Tras Delaware, os territorios de tributación branda máis utilizados polas compañías son Holanda, Irlanda, Luxemburgo, Panamá e Suíza.
 
En conxunto, o estudo contabiliza 1.285 filiais en prazas offshore, con Banco Santander, ACS, ArcelorMittal e Repsol liderando o ránking por número de filiais en nichos fiscais.
 
Os compromisos de Inditex
Inditex pertence ao grupo de compañías que adoptaron como principio reitor da súa estratexia fiscal a “renuncia á utilización de estruturas societarias de carácter opaco que interpoñan sociedades instrumentais en paraísos fiscais, de acordo coa listaxe de territorios considerados como tales pola normativa fiscal española”.
 
A multinacional de Amancio Ortega recolle no seu código de boas prácticas o compromiso de detallar a Facenda a súa presenza en paraísos fiscais, o que gañan e o que tributan en cada país, a súa estrutura de financiamento e os seus riscos fiscais. Esta determinación adoita adoptarse co obxectivo de evitar conflitos que danen a imaxe corporativa e resolver con axilidade as discrepancias que poidan derivarse das inspeccións fiscais.
 
A compañía de Zara foi sinalada nun informe presentado ao Parlamento Europeo polos Verdes, agrupación onde se integra o BNG, por eludir con enxeñería fiscal o pago de 600 millóns en impostos. Inditex rexeitou as conclusións do devandito informe.
 
Os nichos fiscais de Amancio Ortega
A ampla análise realizada sobre a operativa de Inditex no informe do Observatorio RSC deixa un balance de 74 sociedades domiciliadas en países e territorios considerados paraíso fiscal (nove sociedades) ou nicho fiscal (65 sociedades). Se se atende aos criterios da OCDE, a compañía estaría presente en dous paraísos fiscais, Macao e Mónaco.
 
Se se toman como referencia os criterios polos que o Parlamento Europeo ou a rede Tax Justice Network elabora a listaxe de nichos fiscais, a presenza da multinacional en territorios offshore dispárase, ao manter filiais en Delaware (EEUU), Holanda, Irlanda, Suíza, Hong Kong (China), Luxemburgo, Montenegro, Uruguai, Porto Rico, Macedonia, Sudáfrica e Taiwan.
 
“Entre estas 74 sociedades situadas en paraísos ou nichos fiscais considérase que existe un grupo de 25 empresas que ofrecen dúbidas en canto a que a súa actividade teña que ver coa operativa propia de negocio, posto que tanto a declaración da actividade (non operativa) como a súa localización xeran dúbidas sobre a súa utilización posible dentro dunha estratexia fiscal planificada e que non son susceptibles de resolverse ao non achegar a empresa maior información”, di o informe.
 
As sociedades sospeitosas
  Consulte a lista de sociedades en prazas offshore de Inditex 
 
Alude, en concreto, a 16 empresas situadas en Holanda con actividades financeiras, de carteira, de prestación de servizos entre sociedades do grupo, aseguradoras e inmobiliarias. A estas habería que engadir unha sociedade en Taiwan (Pull and Bear Taiwan, B.V. Taiwan Branch), outra en Delaware (ITX USA LLC), dúas en Irlanda , con actividade aseguradora e financeira; e catro en Suíza .