Despois dese primeiro paso, que no seu día rexeitamos por considerar que foi unha funcionarización “á baixa”, procedemos á negociación da RPT  na que defendemos a integración da escala técnica coas mesmas características das que xa tiñan reflectidas o resto das escalas, asegurándonos de que o barrado a dous grupos fose xeneral incluíndo aos auxiliares técnicos de biblioteca, que considerabamos sufriran unha longa discriminación neste sentido. Desta firme defensa informamos nos boletíns do momento.
 
Defendemos, en todo momento, que só construiriamos o colectivo partindo da base de que todas as escalas, subescalas e dentro delas todos os postos tiñan que ter unha configuración e tratamento idéntico para que as normas existentes e das que nos dotásemos puidesen ser de aplicación xeral
 
En coherencia co sinalado, se de verdade queremos un corpo único, un colectivo no que as oportunidades sexan as mesmas para todos e todas, non podemos consentir que a ningunha compañeira ou compañeiro se lle prive dun dereito que se lle aplica ao resto. Este mesmo criterio foi un dos motivos que nos levou a denunciar as prórrogas das comisións de servizos.
 
Neste contexto reivindicativo aparece a “última” proposta de concurso de méritos enviada a todas as traballadoras e traballadores polo Servizo de PAS. A proposta racha co proxecto que nos marcamos como obxectivo ao segregar do concurso de traslados un servizo, neste caso o Servizo de Informática e Comunicacións.
 
Rexeitamos a proposta realizada polo reitor a través da Xerencia porque nos parece ilegal ao non se xustificar motivadamente porqué non se permite aos traballadores e traballadoras do Servizo de Informática e Comunicacións participar no concurso, e porque vai contra o noso obxectivo de conseguir o que sempre chamamos corpo único.