En canto á pobreza, o estudo constata que se “instalou na sociedade española, afectando a persoas e familias que cada vez ven máis difícil saír da súa situación” e alerta da dificultade das novas xeracións que nacen nun ámbito empobrecido de saír desta situación ao longo da súa vida.
 
En concreto, achega datos como que case 700.000 fogares (1,3 millóns de persoas) non teñen ningún ingreso. Por iso, os autores do informe consideran imprescindible unha regulación estatal que garanta unha renda básica non vinculada a procesos de inclusión.
 
O paro de longa duración que afecta a case dous millóns de españois é a expresión máis evidente desta “cronificación” da pobreza. Ante esta situación, propoñen aos políticos deseñar un plan que ofreza a toda persoa desempregada por un tempo superior a dous anos, un emprego de polo menos seis meses de duración.
 
Así mesmo, consideran necesaria a derrogación da Reforma Laboral. O coordinador e redactor do informe, Gustavo García Herrero, explicou que o prezo da recuperación é que deixou “ sen futuro á inmesa maioría da poboación española” que ten que conformarse con sobrevivir “” e non pode facer proxectos vitais.
 
“Agora que o Goberno está tan preocupado pola natalidade, non hai medida máis importante que derrogar a Reforma Laboral, sería a mellor medida para fomentar a natalidade”, precisou García Herrero, que explicou como a precariedade, causada pola inestabilidade no emprego e os baixos salarios, provocan que 6 millóns de persoas estean en permanente risco de caer na pobreza ante calquera posible “vaivén”.
 
Así mesmo, o informe suxire como medida para a xeración de emprego así como para a protección social a firma dun Pacto de Estado para atender ás case 350.000 persoas recoñecidas como dependentes que non reciben atención. Con esta medida, segundo sinalan, xeraríanse 90.000 empregos directos, cun incremento do gasto público de 1,5 millóns de euros ao ano.
 
En canto á exclusión social, os autores do estudo precisaron que hai que distinguila da pobreza pois nestes momentos hai máis de 8 millóns de traballadores que viven baixo o limiar da pobreza pero que non están excluídos. Ademais, alertaron da soidade como a nova forma de exclusión social, que leva a moitas persoas maiores a vivir en situacións “dramáticas”.
 
Segundo advertiu o redactor do capítulo ‘Pobreza e Exclusión Social’, Luís Barriga, existe o risco de caer nun proceso de espiral “acelerada” cara á exclusión nos próximos anos se non se toman medidas para evitalo; e alertou da “bomba de reloxería” que pode ser a exclusión e a situación dos mozos sen futuro.
 
Sobre as desigualdades, o informe precisa que estas non só se están mantendo tras a crise senón que se están incrementando e recolle datos como que o 1% da poboación española con maior patrimonio acaparaba en 2016 máis dunha cuarta parte da riqueza do país, mentres que o 20% máis pobre quedaba cun 0,1%.
 
A Asociación de Directoras e Xerentes de Servizos Sociais entregou o informe aos partidos políticos fronte ao debate que terá lugar este mércores 22 de marzo no Ateneo de Madrid e no que participarán todos os Grupos Parlamentarios.
 
Tamén asistirán diversas organizacións sindicais, sociais e profesionais. Trátase da cuarta ocasión na que se celebra este debate, que ten como obxectivo dar a réplica ao tradicional Debate sobre o Estado da Nación.
 
Ler informe
 
EP