As fontes indican que a subida responde ao continuado encarecemento das materias primas e que, de recollerse na súa totalidade o aumento de custos, a alza na revisión de marzo debería ser do 14%, ata 14,74 euros por bombona.
 
Con todo, como xa ocorreu en bimestres anteriores e como establece a normativa, o incremento limitouse ao 5%, á vez que o importe que as empresas deixarán de ingresar pola insuficiencia de ingresos engrosará o déficit de tarifa do sector.
 
Coa nova subida, o butano acumula catro revisións bimestrais á alza con respecto ao nivel fixado polo Goberno en xullo de 2016, de 11,25 euros. Ese mes, a bombona tocou chan tras unhas secuencia de caídas que a abarataban un 35% desde os niveis de 2015. A pesar das novas subidas, o butano atópase aínda un 22% por baixo dos 17,5 euros rexistrados ata marzo de 2015.
 
A diferenza con respecto a aquel máximo é de case 4 euros. Subidas e baixadas anteriores A subida deste martes producirase tras a do 5% en xaneiro, do 4,7% en outubro e do 4% en setembro. Os incrementos contrastan coas baixadas do 5% tanto en xullo como en maio e en marzo de 2016.
 
En xaneiro de 2016, o prezo máximo aumentou un 3%. O novo incremento de prezos, realizado conforme a un mecanismo de revisión automática, é o terceiro que afronta o novo Goberno.
 
A revisión fíxaa o Ministerio de Enerxía, Turismo e Axenda Dixital, pero depende da cotización da materia prima nos mercados internacionais, de fretes e da variación do tipo de cambio. O prezo regulado afecta as bombonas de butano que máis comunmente utilizan os fogares, envases con carga igual ou superior a 8 quilogramos e inferior a 20 quilos, cuxa tara sexa superior a 9 quilos.
 
EFE