Mariano Rajoy quixo así tranquilizar á Banca, á Igrexa e ao empresariado en xeral, desde as grandes mafias eléctricas ás medianas e pequenas empresas corruptoras ou os simples comisionistas de provincias. “Quen diga que nun prazo de vinte anos estaremos limpos está absolutamente equivocado e non ten nin idea do que significa España nin sabe por que somos unha unidade de destino no universal”, recalcou o presidente aos xornalistas que lle lembraban os numerosos procesos xudiciais que se abren cada día contra o partido no Goberno. 
 
Segundo explican desde Xénova, o Partido Popular conta cun protocolo de seguridade moi sofisticado, “e moi informático”, para evitar que a súa porcentaxe de lerchas se sitúe por baixo dun nivel establecido. Ao parecer, cada vez que un membro do partido é imputado proxéctase un sinal infravermello sobre o ceo de todas as poboacións españolas onde o PP mantén postos nas diferentes institucións. Inmediatamente os dirixentes que a viron póñense a delinquir no primeiro asunto que se lles pon a man, segundo palabras dos responsables do sistema. “Non é unha batsinal pero é de moito nabo”, aseguran.   Máis en Rokambol