As prácticas abusivas das grandes eléctricas levan anos baixo sospeita. Pero nos últimos tempos ás denuncias de asociacións de consumidores e opinión pública uníronse as de organismos públicos. A Comisión Nacional dos Mercados e a Competencia (CNMC) dá agora un paso máis ao sancionar economicamente aos principais grupos do sector por cambiar o recibo da luz e o gas aos seus clientes sen o consentimento previo destes.
 
Aínda que o importe das sancións é baixo, esta decisión abre a porta a que o organismo presidido por José María Marín Quemada actúe a partir de agora directamente contra o abuso fronte ao consumidor. As sancións anunciadas este xoves implican a Endesa  (100.000 euros), Iberdrola (30.000), Gas Natural (10.000) e Viesgo (10.000
 
Segundo explican desde a CNMC, a orixe desta multa provén de sete denuncias de usuarios que chegaron directamente ao regulador a través das oficinas que os concellos habilitan para as queixas do consumidor. Nelas os clientes afectados advertían que sufriran un cambio na empresa comercializadora do seu contrato de luz ou gas sen aviso previo.
 
Aínda que si é a primeira sanción económica por este tipo de prácticas, a CNMC leva varios anos recomendando ás grandes eléctricas españolas que eviten, por exemplo, a captación de clientes mediante canles de venda domiciliaria ou por vía telefónica, sobre todo nos casos de persoas maiores e vulnerables. Nunha guía publicada en 2015 o regulador pide ás compañías que se identifiquen dunha maneira clara ante o consumidor e que eviten mensaxes confusas.
 
A decisión da CNMC chega tras varios meses especialmente convulsos para o sector. A pesar das duras críticas recibidas pola subida do recibo de xaneiro, as eléctricas non mantiveron un perfil precisamente baixo. Entre outros movementos, en febreiro decidiron levar ao Tribunal Supremo o decreto que modifica a metodoloxía do cálculo dos prezos para o pequeno consumidor e o seu réxime de contratación.
 
Economía Digital