Desta volta, as campañas previstas son das consellerías de Medio Rural e de Infraestruturas e Vivenda, e da Rede Dixital de Emerxencias e Seguridade de Galicia ( RESGAL). En total, 1.465.000 euros (con IVE) en tres campañas para “concienciar” aos galegos das distintas políticas e iniciativas postas en marcha por estos departamentos.
 
Así,  a Consellería de Infraestruturas e Vivenda destinará máis de 886.000 euros para a elaboración, produción e plan de medios das campañas de promoción dos ámbitos competenciais atribuídos a este departamento e as súas entidades adscritas durante 2017. A campaña está relacionada coa sensibilidade cidadá sobre a seguridade viaria, a mobilidade e o transporte público e a rehabilitación de vivendas en Galicia. 
 
Por outra banda, a Consellería do Medio Rural adicará case 450.000 euros no desenvolvemento dunha campaña publicitaria de prevención, concienciación e sensibilización social contra os incendios forestais. Esta consellería xustifica esta iniciativa alegando que a Lei 3/2007, de 9 de abril, de prevención e defensa contra os incendios forestais de Galicia, xa recolle que lle corresponde á Xunta desenvolver campañas e actividades de educación e información para a sensibilización da cidadanía no relativo ao combate dos lumes forestais e a persecución das actividades delitivas que causan incendios e coordinar a execución destas campañas.
 
Tamén a Rede Dixital de Emerxencias e Seguridade de Galicia (RESGAL) destinará 127.000 euros para a "Contratación do servizo sucesivo para o desenvolvemento dunha campaña publicitaria sobre, xestionada por Redes de Telecomunicación Galegas Retegal, S.A.". Esta entidade xustifica a convocatoria deste concurso publicitario apuntando que a súa función é dar difusión a este servizo “coa finalidade de que os seus beneficiarios estean ao alcance de todas as entidades prestadoras de servizos de emerxencia”. “Por conseguinte, resulta necesaria a contratación dunha campaña de difusión, coa finalidade de conseguir que os beneficiarios da RESGAL estean ao alcance de todas as entidades interesadas”, suliña.
 
Unha das campañas de publicidade que a Xunta inserta nos medios de comunicación
 
Máis acordos publicitarios
Estes concursos súmanse a outros que foron saíndo nas últimas semanas, entre eles,  das consellerías de Economía e de Política Social por un valor de máis de 2,3 millóns con IVE. Tamén hai uns días, o GC xa daba conta de outros dous contratos da Axencia Turismo de Galicia. Así, un deles busca axencias de comunicación para a elaboración, produción e plan de medios da campaña de promoción dos recursos naturais, culturais e gastronómicos de Galicia durante 2017 por valor de máis de 6,2 millóns de euros con IVE. Por outra banda, destina 400.000 euros con IVE á contratación do servizo “accións de comunicación dixital” da campaña de promoción dos recursos naturais, culturais e gastronómicos de Galicia, así como do Camiño de Santiago en particular.
 
Previamente, era outro concurso de 2,2 millóns de euros que a Secretaría Xeral de Medios destinará aos grandes medios a través de dous acordos marcos para realizar distintas campañas publicitarias no 2017 e 2018.
 
Control mediatico da Xunta
O proxecto de I+D+i ‘Accountability y Culturas Periodísticas en España. Impacto y propuesta de buenas prácticas en los medios de comunicación españoles’, xa alertou de que a Xunta utiliza os cartos públicos para “controlar” aos medios de comunicación privados.
 
"Desde a longa etapa na que Galicia foi gobernada por Manuel Fraga (1990-2005), a práctica de subvencionar aos medios de comunicación foi constante por parte dos distintos executivos autonómicos" e este "modelo de subvencións, axudas ou convenios" funcionou dende entón como "unha forma de garantir o control informativo", recolle o documento. Tanto, que "a gran dependencia económica dos medios galegos dos poderes públicos impide falar de independencia política, aínda que sexa un dos lemas más repetidos nos seus idearios".
 
Galicia Confidencial