Tal e como comunicaron estes colectivos, tras manter unha reunión sobre este tema, dos 654 reclusos de Galicia afectados pola hepatite C, o número de pacientes tratados "apenas excede a decena en máis dun ano".
 
En relación a iso, criticaron que o convenio entre a Consellería de Sanidade e o Ministerio do Interior para o tratamento destes pacientes "só deixa en mans dos facultativos do Sergas a prescrición, reservando a dispensación dos tratamentos a Instituciones Penintenciarias". "Isto dificulta o control e seguimento desas prescricións facultativas", censuraron.
 
As dúas organizacións cualificaron esta situación de "inaceptable" por supor "unha vulneración dos dereitos fundamentais" dos presos, e apuntaron que "detrás deste sistema de acceso escóndese unha vontade deliberada de reducir o número de medicacións efectivamente dispensadas ao mínimo posible, con fins exclusivamente orzamentarios".
 
Ante todo iso, comprometéronse a elaborar unha estratexia conxunta para solucionar este problema, que consideran "moi grave e perentorio", e esixir que se execute "con urxencia" a transferencia das competencias en materia de saúde penal á Xunta para que os reclusos accedan aos servizos sanitarios nas mesmas condicións que o resto de cidadáns.
 
Finalmente, tamén deseñarán accións de información e presión neste sentido e reclamarán que se dispoña unha dotación orzamentaria e de medios "suficiente" para afrontar esta situación "en tanto esa transferencia non se efectúe".
 
Galicia Confidencial