O escenario para a negociación do convenio non só non mellorou, senón que empeorou, xa que a patronal retirou a súa oferta económica inicial e non propoñen ningún tipo de revisión salarial, mentres que se produciu unha perda de poder adquisitivo de xeito constante desde o inicio da estafa que se nis presenta como crise.
 
Reproducimos un artigo de OK diario que reflicte en boa medida a situación nos centros de traballo.
 
Teletenda ou atención ao cliente? Operadoras retiran o soldo aos operadores que non venden

As empresas de telemárquetin retiran o soldo temporalmente aos operadores que axudan ao cliente, pero non venden. E é que, fronte ao que sucedía hai uns anos, a atención ao cliente converteuse nun auténtico centro de televenda. A directriz das compañías de telemárquetin, ao servizo das grandes operadoras do país, é centrarse en vender produtos máis caros dos que xa ten o cliente, no canto de axudarlle.
 
De feito, OKDIARIO tivo acceso a distintas sancións que a empresa Extel, do grupo Adecco, impuxo a algúns dos seus traballadores por “non ofrecer” determinados produtos aos seus clientes. Na maioría dos casos, o traballador queda suspendido de emprego e soldo durante dous días, no que o sector de telemárquetin entende como unha “vergoña”, tendo en conta que o obxectivo debería ser axudar ao cliente, e non vender un produto. De feito, fontes sindicais recoñeceron a OKDIARIO que a maioría dos teleoperadores que atenden en atención ao cliente “non teñen a formación suficiente para dar un servizo de calidade”.
 
Santiago Alonso, Secretario Xeral do sector do telemárquetin de CXT, explica que “aos traballadores de atención ao cliente das compañías obríganos a vender. É dicir, que cando chama un cliente por teléfono, o teleoperador está obrigado a venderlle un produto, non a axudarlle”.
 
“Antigamente, fai sete ou oito anos, o que primaba era a calidade do servizo. E agora as empresas de contact center, non só están a apertar para vender, senón que din que se non venden, sancionan e mesmo despiden ao empregado. E isto está moi xeneralizado entre as principais compañías de telecomunicacións do país”, continúa o portavoz de CXT.
 
Este xornal, de feito, tivo acceso á transcrición dalgunhas das conversacións telefónicas polas cales foron suspendidos de emprego e soldo os teleoperadores. E o certo é que a atención é practicamente perfecta, tendo en conta que soluciona as dúbidas do cliente, pero “lamentablemente” esqueceuse de ofrecer un produto máis caro que o que tiña. Motivo suficiente, baixo o punto de vista da empresa, para sancionar ao empregado.
 
Máis variable, menos soldo fixo
 
“Por mor das renovacións dos contratos, os teleoperadores están a cobrar cada vez máis parte variable polas vendas que fan aos clientes, e os traballadores están a ser absolutamente acosados”, sinala Alonso, que lembra que “atención ao cliente non é un traballo de vendas”.
 
OKDIARIO tivo acceso a mails, follas, sancións, ordes de parámetros de venda e todo tipo de probas que reflicten a directriz que as compañías de telemárquetin dan aos seus traballadores: menos axudar, e máis vender.