Sinálase que:
 
En canto as medidas administrativas que se recollen no título II, cómpre destacar:
 
No capítulo dedicado a función pública, modifícanse varios preceptos da Lei 2/2015, do 29 de abril, de Emprego Público de Galicia. Así, a modificación do artigo 89 incorpora a obrigatoriedade de concursar ao persoal funcionario que está desempeñando un posto en adscrición por motivos de saúde ou rehabilitación dado que o está a ocupar de forma provisional. A modificación do artigo 96 permite maior versatilidade e mobilidade para o persoal funcionario pertencente as escalas, promovendo a promoción deste persoal a outros postos distintos aos da súa escala de orixe. A modificación do artigo 104 ten como finalidade incluír na Lei de emprego público de Galicia a previsión legal contida no artigo 59 da Lei 13/2015, do 24 de decembro, de medidas fiscais e administrativas, segundo o cal, o persoal funcionario procedente da fusión dos concellos que se realicen no ámbito da Comunidade Autónoma, se transfiren e se integran na Administración Autonómica, regulando así, un procedemento de adscrición aos corpos e escalas da Comunidade Autónoma.
 
A disposición adicional primeira da lei modifícase para incorporar que, cando se toma como referencia do desfrute dos permisos a localidade, esta veña referida ao termo municipal de residencia do persoal funcionario. Coa modificación da disposición adicional oitava e novena, modifícanse algunha das escalas e especialidades existentes, así como as funcións que ten asignadas e a titulación correspondente para o acceso as mesmas, adaptándoas aos novos graos existentes e, por outra parte, tamén créanse outras novas escalas. A disposición adicional décima modifícase para adaptar as titulacións ao marco español de cualificacións para educación superior das ramas de coñecemento que están reguladas no Real Decreto 1954/1994, do 30 de setembro, sobre homologación de títulos aos do Catálogo de Títulos Universitarios Oficiais, creado polo Real Decreto 1497/1987, do 27 de novembro e consolidado a 1 de agosto de 2011. A modificación da disposición transitoria terceira unicamente clarifican a redacción actual da lei. Por último, engádese a esta lei dúas disposicións transitorias debido a necesidade de manter un réxime transitorio para o persoal laboral temporal que desempeñe funcións de persoal funcionario e para o persoal laboral afectados pola creación de escalas.
 
Neste capítulo, tamén se modifica a Lei 1/2012 de medidas temporais en determinadas materias de emprego público da Comunidade Autónoma de Galicia, para clarificar que a reserva de posto de traballo unicamente abarca a aqueles que están afectados polos procesos de consolidación de emprego ao amparo do V Convenio Colectivo e o persoal laboral temporal que ocupe postos con anterioridade ao 1 de xaneiro de 2005 e só para aqueles postos de persoal laboral.
 
Tamén, en materia de función pública modifícase a Lei 16/2010, do 17 decembro, de organización e funcionamento da Administración xeral e do sector público, para regular a integración do persoal laboral fixo das entidades instrumentais como persoal laboral da Administración xeral da Comunidade Autónoma de Galicia e a aplicación do convenio colectivo único ao persoal laboral temporal.
 
Por último, introdúcese na lei un artigo ante a necesidade de que a Consellería de Sanidade poida prover un posto de traballo dunha concreta clase da escala de saúde pública, excepcionalmente e de maneira temporal, mediante unha comisión de servizos voluntaria de persoal funcionario doutra clase da mesma escala, sempre e cando a titulación esixida para o acceso á clase orixinaria sexa a mesma que a requirida para o posto de traballo de que se trate.