Iberdrola, Telefónica, Gas Natural, DIA, así ata unha decena de empresas. Desde marzo, o Banco Central Europeo puxo en marcha un programa de compras de bonos de distintas empresas para mover a economía e as empresas españolas tomaron boa nota. Ata quince operacións deste tipo beneficiaron a Telefónica, once a Gas Natural, dez a Iberdrola e cinco a Repsol. Son os resultados "españois" das compras de bonos levadas a cabo polo Banco Central Europea, recompiladas polo Corporate Europe Observatory, radicado en Bruxelas.
 
O estudo de CEO inclúe mencións honoríficas aos investimentos máis bizarros ou estraños, como os subsidios destinados a Novomatic –dedicada a casinos, comecartos e bingos–, ou os fondos públicos destinados a empresas do sector do luxo como Moet Chandon, o cognac Hennessy ou a empresa de bolsos Louis Vuitton.
 
Shell, Volkswagen, BMW, Unilever, Ryanair ou a armeira Thales tamén foron beneficiadas por estes fondos. Como sinala o observatorio CEO, "os resultados son preocupantes, a menos que vostede pense que o petróleo, os coches de luxo, as autoestradas, a champaña, e o xogo son bos lugares para pór diñeiro público".
 
A pesar de que grazas á investigación de CEO se coñece o nome das compañías, Banco Central Europeo non especificou como se repartiron os 4.600 millóns de euros que se puxeron en circulación neste programa expansivo, chamado Programa de Adquisición de Valores Corporativos (CSPP polas súas siglas en inglés), pouco máis dun terzo dos 12.500 que se porán a disposición das multinacionais ata setembro de 2017.
 
O programa é similar ao que funciona desde 2015 para o sector bancario. Diñeiro a intereses extraordinariamente baixos posto a disposición das empresas en forma de crédito. Estas emiten unha serie de bonos, con datas de pago dos intereses ao banco central e unha data de pago do valor nominal do bono. O beneficio xorde deses bonos, impulsados con emisións do banco que dirixe Mario Draghi.
 
De feito, como se pode comprobar na listaxe de beneficiadas publicado por Corporate Europe Observatory, só as multinacionais optan a estes subsidios, que "requiren un coñecemento experto dos mercados financeiros", sinala CEO no seu estudo. "Non é un mundo accesible para as pequenas e medianas empresas", que adoitan pedir créditos e non acoden ás emisión de bonos.
 
Salvo o Bundesbank, os seis bancos centrais implicados como intermediarios nestas operacións –o Banco de España e os bancos centrais de Italia, Francia, Bélxica e Finlandia– non achegan os nomes das entidades beneficiadas, que CEO divulgou tras identificar ás empresas mediante os códigos dos seus bonos.
 
As compras favoreceron especialmente a empresas implicadas no cambio climático. Shell, Eni, Enel, Gas Natural Fenosa ou Repsol entre as enerxéticas ou as automobilísticas Daimler AG, BMW ou Renault foron algunhas das industrias sucias favorecidas pola política de subsidios para empresas. Tamén Volkswagen obtivo estas axudas públicas, a pesar de que hai apenas un ano e dous meses que se coñecera o escándalo da falsificación de datos de emisións, o 'dieselgate'.
 
Veolia  Vivendi ou Suez, actores principais nos procesos de privatización da auga, tamén foron beneficiadas pola variña máxica da institución que dirixe Mario Draghi.
 
Diagonal Periódico