A mafia instalouse no actual equipo de goberno. Non podemos definir a actuación do reitor e compañía con outro apelativo. A política de persoal aséntase na ocultación, a mentira permanente, a transgresión da regulamentación e acordos.
 
As relacións entre a institución e os seus traballadores e traballadoras teñen que estar fundamentadas no principio da boa fe á hora de negociar e da confianza en que os acordos se leven a termo. Esta relación, na actualidade está completamente rota debido ás graves transgresións xa denunciadas como  a vulneración da normativa de comisións de servizo, denunciado por compañeir@s e a APA no xulgado, a mentira á hora realizar o cálculo das prazas suxeitas a promoción... A todos os agravios recibidos únese agora a ocultación dun feito tan importante como a amortización das prazas:

Código	Categoría – Corpo - Escala	Grupo	Nivel
277	Técnico superior en Informática	A1	24
279	Técnico superior en Informática	A1	24
409	Secretario técnico Campus de Ferrol	A1	24
338	Arquitecto técnico	A2	21
030	Posto base	C2	16
138	Auxiliar de servizos	E	14

 

Ao noso xeito de ver a amortización anunciada á Consellería de Facenda é absolutamente ilegal, non foi negociada coa Xunta de Persoal (ocultóuselle ao órgano de representación), amortiza postos de traballo ocupados por funcionari@s de carreira, carece de motivación e, en todo caso é unha mostra máis de mala fe porque, no suposto caso que se intente “legalizar” (que non lexitimar) cunha negociación coa Xunta de Persoal, que negociación real haberá cando xa se lle anunciou á Consellería?.
 
Dixémosvos en varias ocasións que non nos fiabamos do equipo de goberno, nas asembleas comunicámosvolo directamente. Sinalámosvos que, a pesar do acordado no referente ao concurso de méritos, intuíamos que non sairían todas as prazas. Agora confírmase o que para nós era unha sospeita. O xogo sucio do reitor e equipo sitúanos, outra vez, diante dun feito consumado que non podemos deixar sen resposta.
 
Unha vez máis a Xunta de Persoal verase na tesitura de poñer en marcha os medios que for preciso adoptar para restituír a legalidade conculcada coas actuacións do equipo de goberno.
 
Informe da Consellería de Facenda