Con 419 votos en contra, 258 a favor e 22 abstencións, o pleno do Parlamento Europeo decidiu que o tratado de investimentos con Canadá, CETA, non sexa levado ao Tribunal de Xustiza da Unión Europea (TJUE) para que este comprobe a súa compatibilidade cos Tratados da Unión.
 
A chamada "gran coalición" sacou o rodete para que se denegase a posibilidade de que o TJUE revise un acordo que foi aprobado provisionalmente o pasado mes de outubro. Pero hai matices, 62 deputados do S&D (partidos socialdemócratas) votaron a favor da moción. Tamén un deputado da PPE votou pola remisión ao TJUE do texto do CETA.
 
As dúbidas esténdense ao resto dos grupos, liberais, euroescépticos, e por suposto verdes e esquerda (GUE/NGL) querían que a xustiza europea revise un tratado que xa foi cuestionado pola súa inconstitucionalidade en rexións como Valonia en Bélxica ou o Tribunal Constitucional de Alemaña.
 
A resolución, exposta polo GUE/NGL "expresa serias dúbidas sobre a compatibilidade do CETA co artigo 19 do Tratado da UE e os artigos 49, 54, 56, 267 e 340 do Tratado de Funcionamento da UE", segundo expuña onte Esquerda Unida do Parlamento Europeo, dentro da coalición esquerdista.
 
Para esta coalición, o feito de que o Parlamento votase en contra de que se discutise a resolución, indica que hai unha brecha entre os dous partidos da "gran coalición" europea. Non foi así entre os partidos españois, PP, PSOE e Cidadáns –en tres grupos distintos en Bruxelas–que votaron unanimemente en contra da solicitude dun ditame xudicial.
 
Á oposición dalgúns partidos políticos únese a de boa parte da sociedade civil mobilizada contra este tratado e contra o TTIP, que se negocia coa Administración Obama de EE UU. Un exemplo son os sindicatos.
 
Diagonal Periódico