Entre xullo e setembro realizáronse en España máis de 5,3 millóns de horas extraordinarias á semana. Delas, retribuíronse 2.718.200 horas (o 51,06%), mentres que 2.604.700 horas extra non se pagaron, o equivalente ao 48,9% do total.
 
O número de horas extraordinarias realizadas polos asalariados foise reducindo nos últimos anos, coincidindo coa crise económica. Mentres que no primeiro trimestre de 2008 as horas extra contabilizadas á semana superaban os 10 millóns, no terceiro trimestre deste ano a cifra reduciuse case á metade (5,3 millóns).
 
No últimos oito anos, ao mesmo tempo que baixaba o número de horas extra, aumentaba o peso das horas extraordinarias non retribuídas. Así, no primeiro trimestre de 2008 só o 37,9% das horas extra non se pagaban, cifra que agora é do 48,9% pero que chegou a ser moito maior.
 
De feito, no terceiro trimestre de 2012 o 67,3% das horas extraordinarias non tiñan retribución algunha. Ese período, o do terceiro trimestre de 2012, é ademais o que menos horas extraordinarias contabiliza en toda a serie (4.508.200), tanto pagadas como non pagadas.
 
Case 600.000 traballador@s fan horas extra
Dos 15,4 millóns de asalariad@s contabilizad@s polo Instituto Nacional de Estatística (INE) no terceiro trimestre, algo máis de 14,8 millóns non realizaron horas extraordinarias neste período, fronte a case 600.000 que si fixeron.
 
En concreto, 599.400 asalariados, o 3,9% do total, realizaron horas extra entre xullo e setembro. A 282.100 asalariados pagóuselles por este traballo extra, mentres que a 276.800 non se lles retribuíu e 40.500 declaran realizar horas extra tanto pagas como non remuneradas. No terceiro trimestre de 2007, período no que os expertos sitúan o inicio da crise económica en España, os asalariados que realizaban horas extra superaban a cifra de 1,1 millóns de traballadores; agora esta cantidade reduciuse practicamente á metade.
 
En consonancia co maior peso do número de horas extraordinarias non retribuídas producido nos últimos anos, os asalariados que declaran realizar horas extra non remuneradas foron gañando terreo aos que perciben unha retribución por elas. Así, no últimos nove anos a porcentaxe de asalariados que realiza horas extra non retribuídas subiu desde o 29,8% do terceiro trimestre de 2007 ao 46,1% no mesmo período de 2016.
 
As estatísticas demostran que medra a explotación laboral froito da reforma laboral.
 
EP