Desde 2012, o canon dixital por copia privada sufrágase en España con cargo aos Orzamentos Xerais do Estado, polo que o importe fíxase anualmente, "dentro dos límites orzamentarios" establecidos para cada exercicio.
 
En concreto, o Alto Tribunal estima parcialmente o recurso interposto fai tres anos por tres entidades de xestión (Egeda, Dama e Vegap), que entendían que non debían ser os orzamentos estatais os que financiasen este canon, senón exclusivamente os usuarios da copia privada.
 
O Supremo atende á resolución do pasado mes de xuño do Tribunal da UE que consideraba ilegal o canon ao non garantir que o custo da compensación equitativa só sexa sufragado, en último termo, polos usuarios de copias privadas. Por iso, ve "inaplicables" os preceptos do Real Decreto e decláraos nulos.
 
"A xuízo desta Sala, o presente asunto vira fundamentalmente ao redor dun problema de dereito da Unión Europea", sinala o tribunal, quen con todo matiza que introducir unha medida para evitar que as cantidades recadadas dos impostos terminen sufragando a compensación equitativa é "tarefa difícil".
 
Ademais, considera ás entidades de xestión como demandantes "con interese lexítimo" neste asunto, a pesar das alegacións do Avogado do Estado tras coñecer a decisión de Bruxelas.
 
A xustiza europea tumba o canon dixital
 
GaliciaPress