O xerente significou na súa presentación que o seu currículo xa se coñecía porque se difundira entre o colectivo, remarcou o seu carácter dialogante, sinalou que o seu comportamento terá como premisa a honradez e a franqueza, sempre tendo en conta que vai defender os intereses institucionais.
 
A Xunta de Persoal, despois das presentacións de rigor, transmitiulle os acordos adoptados ao respecto do concurso, recalcando o incumprimento dos prazos acordados, sinalándolle, tamén, a urxencia da convocatoria.
 
Aparte dos reiterados incumprimentos de prazos, evidenciáronselle os incumprimentos das normativas acordadas entre as partes significativamente no que se refire ás comisións de servizo, tanto do persoal funcionarizado como no nomeamento do vicexerente de Ferrol.
 
Acordouse realizar unha nova reunión o vindeiro día 14 na que, ademais de rematar coa convocatoria do concurso, se tratarán todos os procesos en marcha, os que non o están por incumprimento dos prazos, e os que corresponde iniciar de xeito inmediato.
 
Pola súa parte a Xunta de Persoal reunirase o día 10 coa finalidade de preparar a reunión do día 14.