Os feitos dos que se lles acusan foron por unha concentración levada a cabo no ano 2010, convocada polo colectivo 'Nais contra a impunidade', fronte a unha igrexa onde a Garda Civil celebraba unha misa polo 12 de outubro. Na devandita concentración pedíronse explicacións e responsabilidades sobre a morte deste mozo, e varias persoas foron identificadas e abriuse unha querela criminal por parte do instituto armado.
 
Onte, unha concentración en apoio arroupou ás Nais á entrada dos xulgados. O xuízo, que fora aprazado desde o pasado mes de xuño, centrouse nas supostas inxurias á Garda Civil, non deixando en ningún momento nomear o tema da morte de Diego Viña, que foi pola que se convocou dita concentración. Nin o dereito da familia para coñecer a verdade, nin as estrañas circunstancias que rodearon a morte deste mozo no cuartel de Arteixo, puideron ser practicamente nomeadas no xuízo, onde tanto o xuíz como o fiscal cortou a calquera dos acusados ou avogados que tentaron nomear o tema: “Esa non é a cuestión, aquí estamos para xulgar un delito de inxurias á Garda Civil”, dixo varias veces o xuíz mentres cortaba as distintas declaracións.
 
Os Gardas Civís que declararon incorreron en varias contradicións, sobre todo en torno ao número de persoas concentradas naquela mobilización. Tamén desde Nais denuncian outras irregularidades, como unha gravación realizada por un axente de paisano co teléfono móbil que na que non se lles chega a identificar a ninguén, pero que foi admitida como proba.
 
Das 15 persoas acusadas a maioría acolléronse ao dereito de non declarar, excepto dúas que declararon por vídeo-conferencia e outras dúas en persoa, entre elas o avogado Fran del Buey, que recoñeceu que estaban concentrados, pero que o que estaban a facer era pedir explicacións sobre a morte de Diego Viña. Del Buey defendeu que “estamos en todo o noso dereito de pedir explicacións, posto que a nai de Diego non recibiu apoio nin recoñecemento ningunha das institucións”. Unha vez máis, a súa intervención foi cortada, baixo o argumento de que “estamos aquí por inxurias á honra da Garda Civil”.
 
Segundo nos conta Pastora, membro de Nais, nai do ex-preso FIES xa falecido Xosé Tarrío, e unha das imputadas neste caso, os avogados cren que a maioría das persoas serán absoltas, pero preocúpalles que se queira usar este xuízo para ir contra varias persoas, entre elas Fran del Buey ou ela mesma. Cre que hai persoas “ás que nos teñen moitas ganas” como represalia ao traballo levado a cabo desde a asociación Nais contra a impunidade.
 
Sobre o apoio recibido ante este proceso, Pastora coméntanos que “estou sumamente orgullosa de toda a xente que veu a solidarizarse connosco fronte ao xulgado e ao resto de persoas que se concentraron noutras partes do estado e mesmo no estranxeiro.
 
Pero quero recalcar que aínda así, tería que haber máis xente, esta nai tería que ter máis apoio. Estamos a falar dun rapaz de 22 anos que foron á súa casa para detelo sen orde de detención, cunha denuncia falsa, e que ao final á súa nai devolvéronlle ao seu fillo cos pés por diante. Esta nai tería que ter o apoio de toda España”.
 
Tras as tres horas e media que durou o xuízo, quedou finalmente visto para sentenza, os acusados enfróntanse a unha petición fiscal de 44.000 € de multa ou 9 meses de prisión.
 
Texto completo en: http://www.lahaine.org/visto-para-sentencia-el-juicio-1