A acción simbólica buscaba levar aos representantes do goberno guatemalteco "a voz das comunidades de Guatemala e de todas as persoas que apoiaron a campaña en defensa das comunidades afectadas e contra a actuación da empresa".
 
A compañía, que chegou ao país centroamericano en 2007, é a promotora dun proxecto hidroeléctrico no río Canbalam, sito no territorio indíxena de Santa Cruz de Barillas.
 
Os colectivos opositores acusan á dirección da empresa de vulnerar os dereitos das comunidades residentes: "Non só se violou o dereito a unha consulta previa sobre a obra, libre e informada, senón que Ecoener-Hidralia fomentou a represión contra os líderes das comunidades que se opuxeron a ela", apuntan, o que desencadeou encarceramentos arbitrarios e varios asasinatos destes líderes, segundo afirman as dúas ONG nun comunicado.
 
O pasado 10 de decembro, con motivo do Día dos Dereitos Humanos (DDHH), Antonio Rogelio Velásquez e Saúl Aurelio Méndez, recibían o premio Orde Monseñora Juan José Gerardi Gondera aos DDHH 2015. Ambos son presos políticos pola súa oposición á construción dunha central hidroeléctrica", apuntaban entón desde Alianza pola Solidariedade. En total, son nove as persoas en prisión por estes motivos, tal como denuncian a ONG e a Asemblea de Pobos de Huehuetenango.
 
Rexeitamento popular
As comunidades residentes na zona onde está proxectada a central hidroeléctrica organizaron unha consulta popular sobre a iniciativa, que se saldou cunha negativa de máis do 90%. É unha das numerosas accións que organizacións guatemaltecas e españolas realizaron contra a construción do complexo.
 
Ademais, o caso sobre a agresión aos DDHH na zona presentouse a semana pasada ante a ONU "co fin de demostrar a necesidade dun tratado vinculante internacional que acabe coa impunidade de empresas multinacionais ante as violacións de dereitos humanos e ambientais que cometen coas súas operacións no estranxeiro", remarcan desde os colectivos.
 
Almudena Moreno, coordinadora de desenvolvemento sustentable de Alianza pola Solidariedade e responsable da campaña TieRRRa, apuntou esta mañá que a acción era "o broche final dun ano de mobilizacións a favor das comunidades de Barillas, onde demos a coñecer un dos casos máis graves de violación dos dereitos humanos".
 
Na súa opinión, "Ecoener-Hidralia debe retirarse do país dunha vez por todas, cancelar calquera expectativa de proxecto nesta rexión onde viven comunidades locais vinculadas ao río, para evitar así que o conflito social e ambiental empeore".
 
Pola súa banda, Alejandro González, coordinador de Amigos da Terra apuntaba hoxe: "Documentáronse os atropelos ocorridos na rexión, que se denunciaron en diversas accións tanto en Guatemala como en España. Agora que Nacións Unidas resolveu establecer un mecanismo vinculante sobre Dereitos Humanos e empresas, esperamos que deixen de existir casos como o de Barillas e a empresa española Hidralia en territorio foráneo".
 
O de Barillas non é o único proxecto polémico dunha hidroeléctrica española no país. A empresa Cobra-ACS puxo en marcha a construción dun enorme complexo hidroeléctrico en Guatemala, sen que se lle preguntase aos máis de 29.000 indíxenas aos que afectan as obras.
 
Diagonal Periódico