O 13,2% das persoas que teñen un traballo en España son pobres e están en risco de exclusión. Son case a metade das persoas en situación de pobreza e exclusión, un 24% da poboación. A situación é peor en dous grupos determinados: mulleres e mozas. A porcentaxe de traballadoras pobres é o máis alto da UE, só superado por Romanía. Son datos do informe Baixan os salarios, crece a desigualdade, publicado hoxe pola ONG Intermon Oxfam.
 
Tamén hoxe, 3 de novembro, o Ministerio de Emprego presentou os datos do paro de outubro. Baixa o ritmo de creación de emprego –como consecuencia da estacionalidade– pero aumentan as afiliacións á Seguridade Social. En total, emprego contabiliza 3.764.982 desempregados, pero a cifra da cifra de demandantes de emprego rexistrados  –onde se contabilizan demandantes non ocupados e persoas en demanda de mellora de emprego ou de traballos especializados– aumentou ata 5.028.171 persoas.
 
Ter un traballo xa non asegura cubrir as necesidades máis básicas, explica Oxfam no seu informe. A desigualdade fixo o seu traballo desde o comezo da crise, aumentando a brecha entre traballos pouco cualificados e a tempo parcial cos empregos de maior remuneración e dereitos."Actualmente, o salario mínimo legal en España non é un salario decente. Os actuais 9.172,80 euros brutos anuais [de Salario Mínimo Interprofesional] non son suficientes e só unha delgada liña de 1.100 euros os separa da liña de pobreza para fogares formados por unha soa persoa (establecida en 8.011 euros)", refire Oxfam. No entanto, hai unha gran parte da poboación que nin sequera chega a ese mínimo legal, concretamente 2,3 millóns de traballadores atópanse no grupo dos que ou chegan por pouco ou non chegan ao SMI.
 
O aumento da desigualdade en España foi a clave deste crecemento dos traballadores pobres. O noso é o segundo país europeo detrás de Chipre onde máis creceu a desigualdade de renda desde 2007. "Mentres en 2006 o 10% máis rico gozaba dunha renda 10 veces superior á do 10% máis pobre, en 2015 esta diferenza foi de 15 veces", asegura Oxfam no seu informe.
 
As mulleres que traballan a tempo completo gañan un 13,8% menos que os homes. Isto significa que as mulleres teñen que traballar 50 días máis para percibir o mesmo salario que un home. Entre as persoas que menos cobran están quen traballan en modalidade de tempo parcial, un 75% das que son mulleres. As mulleres cobran hoxe polo mesmo traballo o que cobraban os homes fai dez anos.
 
Segundo datos de Eurostat para 2015, un de cada catro traballadores españois entre os 18 e 24 anos (un 24,7%) está en risco de pobreza e exclusión. 
 
A desvalorización salarial, factor crave na tímida recuperación do emprego defendida polo Goberno do PP, fixo tamén o seu parte no aumento de pobreza e exclusión. Entre 2005 e 2014, "os salarios do 60% dos traballadores e traballadoras diminuíron", pero os do 30% situada na parte máis baixa da pirámide –os que cobraban menos de 960 euros ao mes en 2014– baixaron por encima da media, cunha caída do 18% en media.
 
A caída do poder adquisitivo dos salarios máis baixos viuse acompañado dun incremento do índice de prezos ao consumo e das subministracións, en especial a luz, que subiu un 50% no período entre 2008 e 2014.
 
Diagonal Periódico