O obxectivo da flotilla Gaza Libre era romper o bloqueo ilegal de Gaza. A diferenza con outras accións similares anteriores era a dimensión da acción. De ter accedido o convoi coas 10.000 toneladas de axuda humanitaria, isto tería suposto de facto o fin do bloqueo, e Gaza podería recibir subministracións por mar.

O goberno israelí quere manter por todos os medios o bloqueo político, cultural e económico que sofre a poboación palestina de Gaza dende que elixiu democraticamente que os seus gobernantes foran os representantes de Hamás. O bloqueo forma parte da estratexia sionista de facerse co control do territorio de toda a Palestina histórica, e no proceso expulsar a poboación palestina das súas terras.

Esta nova agresión, se ben supón unha escalada cualitativa na actuación do Estado israelí, non vén máis que a demostrar o seu carácter colonial e asasino. A matanza forma parte da natureza do propio Estado de Israel; un Estado racista baseado no asasinato e expulsión masiva de palestinos e palestinas e intrinsecamente ligado ás políticas imperialistas de EUA. Ningunha solución virá das mans de EUA, a UE, a Liga Árabe ou dos corruptos réximes árabes como o de Exipto.

É urxente impulsar e ampliar a solidariedade internacional que está a ter lugar en todo o mundo -da cal a flotilla Gaza libre formaba parte-, e esixir que os países europeos rompan as súas relacións económicas co Estado de Israel. A campaña internacional polo boycot, desinvestimento e sancións ao Estado de Israel está a gañar forza. Seguindo o modelo da loita contra o apartheid en Sudáfrica, pretende exercer presión económica sobre o Estado sionista.