Para quen traballan os funcionarios

O Goberno insuflou recursos públicos aos bancos cando deixaron de dar créditos; e ás empresas de construción para que non parasen as súas obras; e aos vendedores de coches para que funcionasen as cadeas de produción; e aos fabricantes de electrodomésticos. A coartada sempre é a mesma: se o diñeiro deixa de circular, afúndese o sistema.
Como para o común dos mortais a única medida de presión efectiva é a folga de consumo, propoño que todos os funcionarios, durante unha semana, deixen de consumir na medida do posible. Se pechamos os nosos moedeiros, ao mellor o Goberno ten que socorrernos tamén a nós, devolvéndonos o poder adquisitivo que levan quitando lustros.
Non podemos deixar de facer o noso traballo, o compromiso persoal e profesional vai mais alá da remuneración recibida; os xestores políticos sábeno, por iso poden permitirse ataques frontais contra a nosa dignidade, como o perpetrado por Zapateiro en servizo e submisión aos sacrosantos mercados.
Aos mestres, os sanitarios, os policías, os xuíces, os traballadores dos servizos sociais e ata dos cárceres non poden desprezarnos: o noso traballo resulta imprescindible para a cohesión social e a calidade da democracia.

A impunidade do Exército israelí no seu asalto

Din que o asalto israelí á chamada Flotilla da Liberdade ameaza con converterse nunha grave crise internacional.
O problema é que hai anos que Israel está a crear unha grave crise internacional.
E, se non, que llelo pregunten aos seus veciños.

Vencéronnos, pero ímonos deixar gañar?

Os acontecementos das últimas semanas abríronme os ollos. Estaba segura de que ao final non iamos ser escoitados os que defendemos a idea de que o capitalismo destrutor que nos goberna non pode manterse en pé.
Pero crin, nun exercicio de utopía e á vez de realismo, que poderiamos cambiar o mundo, que esta crise serviría para demostrar que o sistema ante o que os cidadáns estamos humillados e sometidos non funciona, e que era necesario un cambio nas estruturas sociais, económicas e políticas a nivel mundial. Vencéronnos. Os feitos destas últimas semanas son irresistibles. Aínda así, ímonos deixar gañar?