A parte da análise que xa fixemos sobre a pertinencia de cambiar o modelo de acceso e concurso, que por moito que se diga se verá afectado porque ás prazas que saian a acceso por quenda libre non se poderá optar, da ruptura do modelo establecido pódese deducir que ou ben o equipo de goberno non confía no seu persoal, entendendo que nos postos de máis cualificación e responsabilidade ten que haber unha competencia aberta ao resto do mundo, ou ben quere abrir a porta a que ás prazas sinaladas se poida presentar persoal da súa “confianza” facendo convocatorias “ad hoc” (xa o vivimos nesta universidade) ou baralla ámbalas dúas circunstancias.
 
Se o xerente e reitor conseguen impoñernos a súa proposta, a pesar da oposición que suscita, non só rachan o modelo actual acordado entre a representación institucional e a representación do PAS, romperán, de facto, coas posibilidades reais de promoción e de carreira profesional porque, neste momento en que as OEP son moi restritivas ben pode pasar que ese 25% de reserva se corresponda con todas as prazas que poidan quedar vacantes dos grupos A1 e A2.
 
Pase o que pase, conclúa a situación no punto que sexa, estaremos atent@s porque non podemos confiar nun equipo de goberno que incumpre os compromisos e a palabra dada. Tampouco permitiremos que se importen, na universidade, os modelos de xestión denunciados no Concello.