As 2.500.000 persoas que traballamos nos servizos públicos (universidade, educación, sanidade, bombeiros, servizos sociais, atención á cidadanía, transportes públicos, administración autonómica, local, facenda, seguridade social.....) sufrimos, desde hai anos, unha política de contención salarial que, en termos xerais, supuxo unha perda de poder adquisitivo de 14,6 puntos desde 1991. Agora, rebáixasenos unha media do 5% o próximos sete meses de 2010 e todo o ano 2011. E todo isto, cando a crise non foi xerada polos salarios nin do sector privado nin do sector público senón pola especulación, o investimento en capital risco ou por unha mala xestión financeira dos que, a pesar da crise, continúan gañando diñeiro.

Ademais, esta redución dos salarios no sector público afectará directamente ao consumo. A redución da demanda suporá, sen dúbida, unha redución da produción das empresas e máis paro no conxunto dos sectores da produción e no sector de servizos posto que 2.500.000 persoas e as súas familias limitarán o seu consumo. Todas estas medidas tamén afectarán á próxima negociación salarial no sector privado que seguirá a tendencia do público. De feito, a CEOE esixe que as reducións salariais se apliquen na negociación colectiva do sector privado.

Ante este panorama, a CUT fai un chamamento ás empregadas e empregados públicos a participar en todas as medidas de presión acordadas polos sindicatos e na xornada de folga do próximo día 8 de xuño de 2010. Tamén fai un chamamento ao conxunto da cidadanía para que manifeste a súa oposición a todas estas medidas participando activamente nas accións convocadas.