Estannos a estafar a todos coa recesión
Ao principio chamábana crise e agora é a gran recesión. En realidade trátase dun engano global.
No primeiro acto baleiraron a caixa dos bancos ata impedir a circulación de diñeiro. Daquela asustáronnos, e tremendo asistimos ao segundo acto: o transvasamento de billóns e billóns das arcas dos estados, ou sexa, o noso diñeiro, aos bancos. Ningún economista discrepou.
Coas arcas dos estados baleiras e as dos especuladores cheas, faltaba o terceiro acto. Hai que encher as arcas do Estado de novo, a débeda é insostible. E témolo que facer nós, os desplumados, porque, agora nolos recordan, vivimos por enriba das nosas posibilidades.
En realidade queren asustarnos de novo para que nos apertemos o cinto, reducindo o gasto sanitario, por exemplo, e así, encher de novo as arcas dos estados, rápido, sen molestar, en silencio. A coda final para que pronto poidan empezar de novo con outro engano. O peor é que seguro que os deixamos.

Contra a crise: conciencia de clase
Ata cando imos seguir sendo a carne da que se alimenta o sistema máis inxusto? Reflexionemos e armemos as nosas conciencias coas ferramentas que nos foron dadas polos que pensaron outro modelo social onde ninguén tería máis dereitos nin privilexios, nin podería apropiarse do esforzo de ninguén. En definitiva, un modelo social onde a igualdade predominaría.

Alguén dixo que nesta loita os obreiros só tiñan unha cousa que perder: as súas cadeas.
Comecemos por afrouxalas para desterralas das nosas vidas.