Un recente informe publicado por Ecoloxistas en Acción recompila os datos de 51 estacións de calidade do aire da rede da Xunta, dos concellos da Coruña e Ourense e de distintas instalacións industriais. Os datos mostran maiores niveis de contaminación nos núcleos urbanos de Vigo e A Coruña, sendo a cidade herculina, xunto con Arteixo, onde peor aire se respira.
 
De feito, ata cinco do sete estacións da Coruña detectan niveis de partículas (materiais suspendidos en forma particular como borra, metal, po, cinzas ou cemento) superiores aos máximos fixados pola OMS, e outras dúas pasan o límite en dióxido de xofre.
 
Repsol, Alcoa e Sabón
 
Trátase das situadas en Torre de Hércules, Castrillón, San Diego, Riazor e A Grela. Todas detectan niveis superiores aos saudables en partículas menores de 2,5 micras –as máis prexudiciais-- e, tres delas, tamén o fan en partículas menores de 10 micras, Torre de Hércules, Riazor e A Grela.

Nas máis próximas a Alcoa, Repsol e SGL Carbón é onde se sitúan os niveis máis elevados. De feito, na Grela está unha das estacións de toda Galicia que rexistra maior dióxido de xofre no aire, con 50 días do ano no que se superaron os máximos fixados pola OMS.
 
As outras dúas son as de Cementos Cosmos en Sarria, cos niveis máis altos de Galicia a pesar de que a cementeira apenas operou durante o ano pasado, e a situada por Repsol en Arteixo, a outra localidade de Galicia con peor calidade do aire, se se teñen en conta os rexistros de partículas e dióxido de xofre.
 
As térmicas 
 
A área da Coruña vese influenciada polo que, a xuízo dos autores do estudo, son os principais focos contaminantes de Galicia: o tráfico portuario, o tráfico rodado, grandes industrias como Alcoa ou Ferroatlántica e as térmicas de Meirama e As Pontes.
 
A de Endesa sitúase entre as máis contaminantes de España, aínda que a pesar do seu tamaño non lidera o ranking. Rexistra unhas emisións anuais de 305 toneladas de partículas, 9.000 de dióxido de nitróxeno e 7.000 de dióxido de xofre. As centrais da propia Endesa en León e Teruel son máis contaminantes.
 
A de Gas Natural, máis pequena, emite 105 toneladas de partículas, 3.500 de dióxido de nitróxeno e 5.800 de dióxido de xofre, en datos de 2014.
 
As cidades e unha franxa crítica
 
Ecoloxistas en Acción sostén que "2,5 millóns de galegos respiran un aire prexudicial para a saúde segundo as recomendacións da OMS", atopando afectacións importantes no cinto industrial conformado por Arteixo e A Coruña e a área industrial de Vigo. Unha das dúas estacións situadas por PSA Citröen detecta niveis superiores aos fixados pola OMS en partículas menores de 2,5 micras.
 
Xunto a estes núcleos, "a contaminación xerada desde estes grandes focos de emisión esténdese polo resto do territorio galego afectando a zonas máis afastadas e rurais na forma de ozono troposférico, como sucede por exemplo na franxa Ordes-Eume, zona de calidade do aire que se estende por áreas das provincias da Coruña e Lugo moi influenciadas pola contaminación das centrais de carbón das Pontes (Endesa) e Meirama (Gas Natural Fenosa)".
 
Dióxido de xofre
 
En canto ao dióxido de xofre, o informe concreta que se rexistraron superacións da concentración media diaria que a OMS recomenda non pasar nunca" en lugares próximos á central térmica de carbón de Meirama ou a grandes industrias.
 
As superacións tiveron lugar en "cinco das seis estaciones da Coruña que miden este contaminante, así como en Pastoriza (Arteixo), en Oural (Sarria, Lugo) e en Xove (Lugo), baixo a influencia das emisións da área industrial de Arteixo-A Coruña, de Cementos Cosmos e de Alcoa San Cibrao, respectivamente".
 
Alcoa, tras as críticas da asociación ecoloxista Arco Iris polas altas cantidades de dióxido de xofre na Coruña, xa afirmara que cumpre escrupulosamente a normativa e que destina importantes investimentos a medio ambiente para iso, ao ser un dos compromisos da compañía. Cementos Cosmos, pola súa banda, lembra que apenas tivo actividade o ano pasado en Oural, polo que rexeita que os índices de contaminación deban atribuírse ás súas operacións.
 
Economía Digital