O Goberno español e os grandes empresarios aseguran que se está  experimentando unha “recuperación económica”, pero, que se esconde tras esa afirmación?
 
Segundo datos estatísticos oficiais, desde o ano 2007 os soldos dos traballadores e traballadoras son cada vez máis baixos, mentres que os beneficios empresariais van á alza. A fórmula para chegar a esta situación non é para nada nova:  a burguesía aumenta a súa taxa de beneficio a conta dunha maior explotación da clase traballadora.
 
Segundo cifras do Instituto Nacional de Estatística (INE), ao peche do primeiro trimestre de 2016, o Produto Interior Bruto (PIB) a prezos de mercado situouse  en 274.817 millóns, preto xa dos niveis de antes de 2007, pero os soldos dos traballadores e traballadoras sitúanse en 129.874 millóns de euros, un 3,2% menos que ao termo de 2007. Ademais, o seu peso é hoxe do 47,2% do PIB, fronte ao 48,5% de entón, tras anos de redución salarial.
 
Estas informacións confirman que a clase obreira está experimentado unha importante perda xeral de poder adquisitivo. Desde 2010, os soldos baixaron un 6,2%, o que equivale a 109 euros por mes (1.304 euros ao ano).
 
Alto desemprego
 
A isto hai que engadir, ademais, a dura situación económico-social que padecen os desempregados e desempregadas. España conta actualmente cunha taxa de paro do 22,7%. Trátase, de feito, do segundo país da Unión Europea con máis desemprego de longa duración. Ademais, só o 54,7% dos parados reciben algún tipo de axuda, segundo datos do Ministerio de Emprego referidos ao primeiro trimestre do 2016.
 
De Libre Red