Até agora o Centro de Estudos Superiores Universitarios de Galiza (CESUGA), adscrito á Universidade San Jorge, que imparte titulacións relacionadas coa construción era a única universidade privada da comunidade, a esta únese agora ao IESIDE que terá presenza en Vigo, Pontevedra, A Coruña, Lugo Ourense e Ferrol.
 
Segundo sinalaron os representantes do banco na súa presentación o día 26 en Compostela, o IESIDE é unha institución de educación superior orientada á empresa que "nace co propósito de complementar a oferta universitaria existente en Galicia e potenciar a cooperación entre as empresas e as universidades da comunidade autónoma".
 
IESIDE iniciará a súa actividade en setembro deste ano cunha infraestrutura composta por catro centros: tres para uso formativo situados en Vigo, A Coruña e Pontevedra, e unha residencia de estudantes situada en Pontevedra. Tamén contará co soporte adicional do resto de edificios do banco e de Afundación nas diferentes cidades galegas. IESIDE terá 14 profesores a tempo completo, 52 profesores asociados, 4 profesores estranxeiros visitantes e 350 profesores colaboradores.
 
Na reunión do Consello de Goberno do pasado día 28, o decano da Facultade de Económicas Anxo Calvo sinalou que é preciso diante desta circunstancia tomar unha decisión, ou ben se “colabora” como parece que se está a facer na UVigo ou se “compite”. Sinala o feito desta nova situación na que as universidades privadas estenden os tentáculos introducíndose nas universidades públicas e propón unha discusión no seo do órgano para decidir a relación con este novo fenómeno.