O CSN entregou seis informes á organización Transparencia Internacional e, no primeiro deles, asinado por técnicos da área de ciencias da terra do organismo, conclúe que “non se pode afirmar que o terreo sexa idóneo debido a características desfavorables” como a presenza de materiais xesíferos e arxilas en contacto coa auga.
 
Por esa razón, para autorizar a obra, cre necesario medidas compensatorias que minimicen a posibilidade de acceso de auga ao subsolo, limitando a activación de fenómenos de disolución e expansividade durante a escavación, construción e operación. Tamén esixe, entre outras cuestións, un plan de vixilancia do terreo con finalidade xeotécnica e hidroxeolóxica, que verifique a eficacia destas medidas.
 
Outro informe de avaliación da área de enxeñería mecánica do CSN determina que é aceptable a solución estrutural de Enresa para afrontar os posibles riscos de expansión das arxilas, aínda que pide a Enresa unha análise en detalle de todas as súas actividades e un constante control para poder identificar a aparición de procesos de inchamentos do terreo ou de disolución de xesos.
 
Con todo, outro dos informes entregados, elaborado pola enxeñería URS España, afirma que nos traballos de Enresa faltan datos ou se minusvaloran riscos. O estudo sinala que se dispón de información “insuficiente” sobre a rede de fracturación do subsolo ou a posible presenza de recheos kársticos en profundidade e baixo o río Zánkara.
 
Tamén se mostra en desacordo con Enresa sobre o risco dun sismo, xa que na súa opinión “non é descartable” un terremoto de 5,5 de magnitude. O informe non comparte os impactos que Enresa prevé en canto á disolución de minerais no subsolo polas augas subterráneas.
 
Segundo Enresa, a auga subterránea está en equilibrio co medio rochoso polo que os procesos de disolución derivados da interacción auga rocha non poden xerar risco de subsidiencia “apreciable”, afirmación que a consultora non comparte.
 
Carlos Villeta, portavoz da Plataforma Contra o Cemiterio Nuclear de Cuenca, criticou o segredo con que se realizou o proxecto. O activista lamentou que estes informen non fixesen públicos antes e confía en que se paralice a súa construción definitivamente
 
El Ventano