Os tres que resultaron calcinados en Outeiro de Rei eran propiedade da empresa Ríos Sangiao, especializada no traslado de alimentos líquidos e  traballaban de forma habitual para Logística Alimentaria. Os vehículos estaban estacionados nunha parcela que é propiedade da fábrica -antiga planta de envasado de Pascual e de Alimentos Lácteos-.
 
Precisamente, esta empresa foi sinalada pola Plataforma en Defensa do Sector Lácteo esta mesma semana, cando se concentraron ás súas portas decenas de gandeiros e varios tractores. Os gandeiros decidiron "identificar" a esta industria para denunciar que é unha das empresas que está "a importar leite de fóra" e "incumpre" os contratos cos seus propios provedores.
 
A este incidente referiuse o portavoz do sindicato Unións Agrarias (UU.AA) na Plataforma en Defensa do Sector Lácteo, Óscar Pouse, que desvinculou á súa organización do suceso. Con todo, recoñeceu que pode ser consecuencia da "dramática" situación que están a vivir algunhas explotacións.
 
“Esperemos que a Administración tome nota do sucedido, porque a xente desesperada, realiza accións desesperadas, e as organizacións sindicais levan moito tempo dicindo que a actual situación do sector lácteo galego é insustentable”, suliñou.
 
Nos últimos días, a Plataforma en Defensa do Sector Lácteo está a desenvolver unha campaña "clara" de denuncia da importación de leite foráneo, mediante o seguimento dos camións que entran en Galicia para abastecer ás industrias asentadas na Comunidade Autónoma.
 
Galicia Confidencial